កម្លាំងរដ្ឋបាលជលផល ក្នុងរយៈពេល៤ខែដើមឆ្នាំ២០២៥ បានបង្រ្កាបបទល្មើសនេសាទ១១ករណី ឃាត់ខ្លួនជនល្មើស១០នាក់ បញ្ជូនទៅតុលាការ ដើម្បីអនុវត្តតាមនីតិវិធីច្បាប់។

ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកែប លោក ថឹង បូរិន បានបញ្ជាក់ថា ខេត្តកែបក្រោមការដឹកនាំរបស់ឯកឧត្តម សោម ពិសិដ្ឋ សមិទ្ធផលថ្មីៗជាច្រើន បានលេចចេញជារូបរាងបន្តបន្ទាប់ ក្នុងនោះវិស័យទេចរណ៍ និងវិស័យកសិកម្មជា វិស័យស្នូលសម្រាប់ខេត្តកែប។

លោកបានបន្តថា ដោយអនុវត្តតាមការណែនាំរបស់ ឯកឧត្តមអភិបាលខេត្ត ចាប់ពីខែមករា ឆ្នាំ២០២៥ រហូតមកដល់ពេលនេះ កម្លាំងខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តកែប ​បានអនុវត្តវិធានការបង្ការ ទប់ស្កាត់ និងបង្ក្រាប បទល្មើសជលផលក្នុងដែន​នេសាទ​សមុទ្រខេត្តកែប សរុបបាន១១ករណី ដោយបានរិបអូសទូកនេសាទល្មើសចំនួន៣គ្រឿង រួមជាមួយឧបករណ៍ឆក់៦គ្រឿង និងខ្សែភ្លើងមួយចំនួនត្រូវបានដកហូត ខណៈដែលអ្នកប្រព្រឹត្តបទ​ល្មើស ១០នាក់ មាន៥នាក់ជាជនជាតិខ្មែរ និង៥នាក់ទៀតជាជន​ជាតិបរទេស ត្រូវបានបញ្ជូនទៅ​សាលាតំបូងខេត្តកែប​ដើម្បីអនុវត្តតាមនិតិវិធីច្បាប់។

នៅក្នុងការចុះបង្ក្រាប១១ករណីនោះ សមត្ថកិច្ចជំនាញ ក៏បានពិន័យអន្តរការណ៍ចំនួន០២ករណី បានអនុវត្តវិធានការអប់រំណែនាំបាន​ចំនួន០៦ករណី ធ្វើកិច្ចសន្យាដល់អ្នកនេសាទ​សរុបចំនួន ០៦នាក់ ដកហូតឧបករណ៍ឆក់សរុបចំនួន០៦គ្រឿង​ អួនអូសមានភ្ជាប់ខ្សែភ្លើងចំនួន០៦ចូរ។

លោកបន្ថែមថា ក្នុងការបង្រ្កាបបទល្មើសជលផលនេះ​ មិនមានការលើកលែងនោះទេ ទោះជនជាតិណាក៏ដោយ អោយតែនេសាទដោយល្មើសច្បាប់ ក្នុងដែនសមុទ្ររបស់ខេត្តកែប៕