ក្រុមអ្នកជួយសង្គ្រោះ អាចត្រូវបានគេមើលឃើញកំពុងជួយមនុស្សតាមរយៈរទេះរុញ នៅជិតទីតាំងនៃការផ្ទុះ នៅឯកំពង់ផែ Bandar Abbas របស់ប្រទេសអ៊ីរ៉ង់ កាលពីយប់ថ្ងៃសៅរ៍ (ទី២៦ ខែមេសា)។

សមាជិកនៃអឌ្ឍចន្ទក្រហមអ៊ីរ៉ង់ កំពុងជួយនៅកន្លែងកើតហេតុដែលសង្ស័យថា ការផ្ទុះកើតឡើងបណ្ដាលមកពីសារធាតុគីមី ជាហេតុការណ៍ដែលបានបណ្ដាលឲ្យមនុស្សយ៉ាងហោចណាស់ ១៤នាក់ បានបាត់បង់ជីវិត និងជាង ៧៥០នាក់រងរបួស។ នៅកន្លែងនោះ យន្តហោះពន្លត់អគ្គិភ័យក៏អាចត្រូវបានមើលឃើញផងដែរ នៅក្នុងវីដេអូ ដែលបានទម្លាក់ទឹកពីលើអាកាសនៅក្បែរអណ្ដាតភ្លើងកំពុងឆេះ។

ប្រព័ន្ធផ្សព្វផ្សាយអ៊ីរ៉ង់ បានរាយការណ៍ថា រដ្ឋមន្ត្រីក្រសួងមហាផ្ទៃអ៊ីរ៉ង់ លោក Eskandar Momeni បាននិយាយថា មនុស្សចំនួន ៦នាក់ នៅតែបាត់ខ្លួន ខណៈដែលក្រុមពន្លត់អគ្គិភ័យ នៅតែបន្តធ្វើការ ដើម្បីពន្លត់អគ្គិភ័យនេះ បើទោះបីជាមានបញ្ហាប្រឈមដោយសារខ្យល់បក់ខ្លាំងក៏ដោយ។

ពុំទាន់មានការផ្ដល់ពីមូលហេតុពិតប្រាកដពាក់ព័ន្ធនឹងការផ្ទុះនេះនៅឡើយទេ។ អ្នកនាំពាក្យរដ្ឋាភិបាលលោកស្រី Fatemeh Mohajerani បាននិយាយថា វានឹងចំណាយពេលខ្លះ ដើម្បីរកមូលហេតុពិតប្រាកដ ប៉ុន្តែរហូតមកដល់ពេលនេះ អ្វីដែលត្រូវបានកំណត់នោះគឺថា កុងតឺន័ររក្សាទុកនៅជ្រុងមួយនៃកំពង់ផែនេះ ដែលទំនងជាមានផ្ទុកសារធាតុគីមី បានផ្ទុះឡើង។ 

ឧប្បត្តិហេតុនេះបានជំរុញឲ្យអាជ្ញាធរអ៊ីរ៉ង់ ប្រកាសភាពអាសន្ននៅក្នុងទីក្រុង Bandar Abbas ដើម្បីការពារពលរដ្ឋ ចំពេលមាន «ការកើនឡើងយ៉ាងខ្លាំងនូវការបំពុលខ្យល់»។ អភិបាលតំបន់ លោក Mohammad Ashouri Taziani បាននិយាយថា មនុស្សដែលរងរបួសកំពុងត្រូវបានគេបញ្ជូនទៅកាន់មណ្ឌលវេជ្ជសាស្ត្រ Bandar Abbas។ បើយោងតាមប្រព័ន្ធផ្សព្វផ្សាយរដ្ឋ បានឲ្យដឹងថា កំពង់ផែនេះត្រូវបានបិទ ហើយប្រតិបត្តិការដែនសមុទ្រត្រូវបានផ្អាក។ 

ប្រធានាធិបតីអ៊ីរ៉ង់ Masoud Pezeshkian បានបញ្ជាឲ្យស៊ើបអង្កេតរកមូលហេតុនៃឧប្បត្តិហេតុនេះ។ ហើយលោកបានសរសេរនៅលើបណ្ដាញ X ថា រដ្ឋមន្ត្រីក្រសួងមហាផ្ទៃត្រូវបានបញ្ជូនទៅតំបន់ ដើម្បី «ពិនិត្យទំហំនៃគ្រោះថ្នាក់នេះ»៕