ប្រធានាធិបតីអាមេរិក លោក Donald Trump និងសមភាគីអ៊ុយក្រែន លោក Volodymyr Zelensky បានជួបប្រជុំរយៈពេលខ្លីយ៉ាងស្ងាត់ៗ នៅឯវិហារ St. Peter's Basilica មុនពិធីបុណ្យព្រះសពរបស់សម្តេច ប៉ាប ហ្វ្រង់ស៊ីស កាលពីថ្ងៃសៅរ៍ (ទី២៦ ខែមេសា) ដោយនេះជាការជួបគ្នាលើកដំបូងរបស់ពួកលោក គិតចាប់តាំងពីមានការប៉ះទង្គិចគ្នានៅសេតវិមាន ហើយប្រធានាធិបតីអាមេរិកក្រោយមក បានបង្ហាញការសង្ស័យថា តើមេដឹកនាំរុស្ស៊ី លោក Vladimir Putin ចង់បានកិច្ចព្រមព្រៀងសន្តិភាពដែរ ឬទេ។

លោក Zelensky បាននិយាយថា លោក និងលោក Trump បានពិភាក្សាគ្នា អំពីលទ្ធភាពនៃការមានបទឈប់បាញ់ដោយគ្មានលក្ខខណ្ឌ ជាមួយរុស្ស៊ី ហើយបាននិងកំពុង «សង្ឃឹមទទួលបានលទ្ធផល» ពី «កិច្ចប្រជុំពេញដោយអត្ថន័យនេះ ដែលអាចក្លាយជាប្រវត្តិសាស្ត្រ»។

បន្ទាប់ពីចាកចេញពីទីក្រុងរ៉ូម ប្រទេសអ៊ីតាលី លោក Trump បានបង្ហាញនូវវិធីសាស្រ្តថ្មី ចំពោះប្រធានាធិបតីរុស្ស៊ី។ តាមរយៈការបង្ហោះនៅលើវេទិកាសង្គម Truth Social របស់លោក លោក Trump បានលើកឡើងថា៖ «មិនមានហេតុផល ដើម្បីឲ្យលោក Putin បាញ់មីស៊ីលចូលទៅតំបន់ស៊ីវិល ក៏ដូចជាទីក្រុងតូច-ធំរបស់អ៊ុយក្រែន ក្នុងរយៈពេលប៉ុន្មានថ្ងៃចុងក្រោយនេះទេ»។

លោកប្រធានាធិបតីអាមេរិករូបនេះ បានបបន្ថែមថា៖ «វាធ្វើឲ្យខ្ញុំគិតថា ប្រហែលជាលោកមិនចង់បញ្ឈប់សង្រ្គាមទេមើលទៅ លោកគ្រាន់តែធ្វើពុតជាចង់ធ្វើការជាមួយខ្ញុំ ហើយយើងត្រូវដោះស្រាយជាមួយគាត់ដោយវិធីផ្សេងៗ តាមរយៈ «ប្រព័ន្ធធនាគារ» ឬ «ទណ្ឌកម្មបន្ថែម? មនុស្សកំពុងស្លាប់ច្រើនពេកហើយ!!!»។

បើយោងតាមរូបភាពដែលចេញផ្សាយដោយប្រធានាធិបតីអ៊ុយក្រែន បានបង្ហាញឲ្យឃើញថា លោក Trump និងលោក Zelensky បានអង្គុយទល់មុខគ្នា ដោយឱនមុខរកគ្នា ដើម្បីពិភាក្សាយ៉ាងស៊ីជម្រៅ នៅជ្រុងមួយនៃវិហារ St. Peter's Basilica ខណៈដែលមឈូសរបស់សម្តេច ប៉ាប ដាក់តម្កល់នៅមុខអាសនៈ មុនពេលពិធីបុណ្យព្រះសពចាប់ផ្តើម៕