មន្ត្រីសេតវិមានបានប្រាប់ឲ្យដឹងថា លោកប្រធានាធិបតី Donald Trump និងរដ្ឋបាលរបស់លោក នៅសប្តាហ៍នេះ នឹងបង្ហាញពីសមិទ្ធផលរយៈពេល ១០០ថ្ងៃដំបូងរបស់លោក នៅក្នុងតំណែង ខណៈពេលដែលសម្លឹងឆ្ពោះទៅ ១០០ថ្ងៃបន្ទាប់ដែលផ្តោតលើកិច្ចព្រមព្រៀងពាណិជ្ជកម្ម និងកិច្ចចរចាសន្តិភាព។

បន្ទាប់ពីល្បឿននៃការផ្លាស់ប្តូរដ៏លឿនរហ័សដែលបានធ្វើឲ្យសម្ព័ន្ធមិត្តនៅមិនសុខ និងផ្ដល់ភាពស្រឡាំងកាំងដល់គូបដិបក្ខ ក្នុងនោះរួមទាំងនៅក្នុងផ្នែកគោលនយោបាយសង្គម ដូចជាសិទ្ធិរបស់អ្នកប្តូរភេទជាដើមផងដែរនោះ មន្ត្រីមួយរូបបាននិយាយថា លោក Trump បានមាន «វិធានការខ្លាំងក្លា» នៅក្នុងគំនិតរបស់លោក ប៉ុន្តែមិនបានពន្យល់ថា តើវាជាអ្វីនោះទេ។

គួរបញ្ជាក់ថា លោក Trump បានធ្វើការផ្លាស់ប្តូរយ៉ាងទូលំទូលាយ ជុំវិញអាទិភាពគោលនយោបាយក្នុងស្រុក និងបរទេសរបស់សហរដ្ឋអាមេរិក ចាប់តាំងពីចូលកាន់តំណែងនៅថ្ងៃទី២០ ខែមករា។ លោកបានធ្វើឲ្យសណ្តាប់ធ្នាប់សេដ្ឋកិច្ចពិភពលោកប្រែប្រួល ជាមួយនឹងវិធានការដំឡើងពន្ធ បន្ថយទំហំរដ្ឋាភិបាលសហព័ន្ធ ដោយកាត់បន្ថយការងារ និងបញ្ចប់កម្មវិធីភាពចម្រុះ ទាំងនៅក្នុងវិស័យសាធារណៈ និងឯកជន។ លោកក៏បានចាត់វិធានការផងដែរ ចំពោះអ្នកសិក្សា ក្រុមហ៊ុនច្បាប់ និងតុលាការ។

នៅសប្តាហ៍នេះ លោក Trump គ្រោងធ្វើដំណើរទៅកាន់រដ្ឋ Michigan សម្រាប់ការជួបជុំមួយ ដើម្បីរំលឹកដល់ព្រឹត្តិការណ៍សំខាន់ៗចំនួន ១០០ថ្ងៃ។ សេតវិមានមានបំណងរំលេចទស្សនៈវិស័យសេដ្ឋកិច្ចរបស់លោក ការបណ្តេញជនអន្តោប្រវេសន៍ខុសច្បាប់ ការផ្លាស់ប្តូរ ចំពោះគោលនយោបាយការបរទេស និងការងារនៃក្រសួងប្រសិទ្ធភាពរដ្ឋាភិបាលរបស់លោកមហាសេដ្ឋី Elon Musk ដែលត្រូវបានបង្កើឡើង ដើម្បីបោសសម្អាតការិយាធិបតេយ្យសហព័ន្ធ និងកាត់បន្ថយនូវអ្វីដែលខ្លួនមើលឃើញថា ជារឿងខ្ជះខ្ជាយឥតប្រយោជន៍៕