កំពង់ឆ្នាំង៖ លោកឧត្តមសេនីយ៍ត្រី អ៊ុំ សុភា មេបញ្ជាការតំបន់ប្រតិបត្តការសឹករងកំពង់ឆ្នាំង នៅថ្ងៃទី២៧ ខែមេសា ឆ្នាំ២០២៥នេះ បានដឹកនាំកម្លាំងកងទ័ពចុះជួបប្រជានេសាទ និង​បទ​ល្មើស​មួយ​ចំនួន រួមនិងណែនាំពួកគាត់ ឲ្យ​ប្រើឧបករណ៍ត្រូវច្បាប់ស្តីពីជលផល ដើម្បីរក្សា​នូវ​ធន​ធាន​ជល​ផល ជីវចំរុះបាតទន្លេ ព្រៃលិចទឹក ដីតំបន់៣ ក៏ដូចជាថែរក្សាបឹង​ទន្លេសាប​អោយ​ល្អ​ទៅ​ថ្ងៃ​អនាគត។

លោកឧត្តមសេនីយ៍ត្រី អ៊ុំ សុភា បានថ្លែងបន្តថា៖ យើងទាំងអស់គ្នាជាជនជាតិខ្មែរ ត្រូវ​ពួត​ដៃ​គ្នា​ជាមួយ​អាជ្ញាធរគ្រប់ជាន់ថ្នាក់ កងកម្លាំងប្រដាប់អាវុធទាំង៣ និងអាជ្ញាធរទន្លេសាប ដើម្បីការពារ​បឹង​ទន្លេសាប ជីវចំរុះក្នុងទឹក និងលើទឹក រក្សាធនធានមច្ឆាជាតិ ព្រៃលិចទឹក និងដីតំបន់៣ ដើម្បី​អោយ​បឹង​ទន្លេសាប និងទន្លេសាប មាននិរន្តរភាពបានយូរអង្វែងតទៅអនាគត។ កុំប្រើប្រាស់​ឧបករណ៍​ដែល​ខាងក្រសួង មន្ទីរកសិកម្ម និងរដ្ឋបាលជលផលហាមឃាត់ កាលណាបងប្អូន​ប្រើប្រាស់​ឧបករណ៍ទាំងនោះ នឹងត្រូវជាប់ទោសទណ្ឌ និងមានកំហុសេជាមួយកូនចៅជំនាន់ក្រោយដោយយើងបានចូលរួមបំផ្លាញផលមច្ឆាជាតិ មិនបានជួយថែរក្សានូវបឹង និងទន្លេធម្មជាតិរបស់យើង។ លោកឧត្តមសេនីយ៍ត្រី បានអោយប្រជានេសាទ ជួយផ្តល់ព័ត៌មានទាក់ទងនឹងបទល្មើសនេសាទ ដែលជនសង្ស័យបានប្រព្រឹត្តនៅតាមដងទន្លេសាប ទោះជាបទល្មើសអ្វីក៏ដោយ។

ប្រជានេសាទលក្ខណៈគ្រួសារ បានថ្លែងអំណរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានអោយកម្លាំងកងទ័ពចុះមកបង្ក្រាបបទល្មើសនេសាទគ្រប់ប្រភេទនាពេលនេះ ព្រោះពួកគាត់យល់ថា ក្រោយការបង្ក្រាបបទល្មើសទាំងនោះ ប្រជានេសាទទាំងអស់នឹងអាចនេសាទត្រីបានច្រើនជាងមុន មិនមានអ្នកហាមឃាត់ និងមានជីវភាពល្អប្រសើរជាងពេលមុន។ ពួកគាត់បានស្នើសុំអោយកម្លាំងអាជ្ញាធរគ្រប់ជាន់ថ្នាក់ មន្ទីរកសិកម្ម រុក្ខាប្រម៉ាញ់ និងនេសាទ កម្លាំងខ័ណ្ឌរដ្ឋបាលជលផល និងកម្លាំងប្រដាប់អាវុធទាំង៣ បន្តចុះបង្ក្រាបបទល្មើសថែមទៀត និងកុំអនុគ្រោះដល់ជនសង្ស័យប្រព្រឹត្តបទល្មើសនេសាទអោយសោះ។

នៅរដូវនេះ ជារដូវហ៊ុំសម្រាស់ នៅតាមដងទន្លេគេឃើញមានដើមកំប្លោកជាច្រើនកកកុញពេញទន្លេ កន្លែងខ្លះមិនអាចអោយប្រជានេសាទលក្ខណៈគ្រួសារអាចដាក់មងចងសន្ទូចបានទៀតផង ។ ករណីនេះ ប្រជានេសាទបានសុំថ្នាក់លើ មេត្តាបង្កើនការបង្ក្រាបផង ព្រោះបើដាក់មងចងសន្ទូចពេលកំប្លោកហូរចេញមកនឹងត្រូវដាច់មងសន្ទូចអស់គ្មានសល់៕ កាំង ហុងវាស្នា