កងទ័ពអ៊ីស្រាអែល បាននិយាយកាលពីថ្ងៃអាទិត្យ ថា ខ្លួនបានវាយប្រហារលើអគារមួយកន្លែងនៅភាគខាងត្បូងទីក្រុងBeirut ដែលអគារនេះត្រូវបានប្រើប្រាស់សម្រាប់រក្សាទុកមីស៊ីលស៊ីបគោលដៅជាកម្មសិទ្ធិរបស់ក្រុមហេសបូឡា។ ការវាយប្រហារនេះ គឺជាការសាកល្បងបន្ថែមទៀតនៃបទឈប់បាញ់ដ៏ផុយស្រួយរវាងអ៊ីស្រាអែល និងក្រុមសកម្មប្រយុទ្ធគាំទ្រដោយប្រទេសអ៊ីរ៉ង់។

រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយនៅក្នុងសេចក្តីថ្លែងការណ៍ថា មីស៊ីលស៊ីបគោលដៅរបស់ក្រុមហេសបូឡា «បានបង្កការគំរាមកំហែងយ៉ាងខ្លាំងដល់រដ្ឋអ៊ីស្រាអែល»។ ប៉ុន្តែពុំមានការអត្ថាធិប្បាយភ្លាមៗពីក្រុមហេសបូឡានៅឡើយទេ។

ការវាយប្រហារចុងក្រោយនេះ បន្ថែមភាពតានតឹងលើបទឈប់បាញ់សម្របសម្រួលដោយសហរដ្ឋអាមេរិក ដែលបានបញ្ចប់ជម្លោះដ៏មហន្តរាយកាលពីឆ្នាំមុនរវាងអ៊ីស្រាអែល និងក្រុមហេសបូឡា។

អ្នកសម្របសម្រួលពិសេសរបស់អង្គការសហប្រជាជាតិសម្រាប់ប្រទេសលីបង់ បាននិយាយលើបណ្តាញX ថា ការវាយប្រហារនោពេលនេះទៅលើទីក្រុងបេរូតភាគខាងត្បូង ធ្វើឲ្យមានការភ័យខ្លាច និងព្រួយបារម្ភ ពីការកើតមានអំពើហិង្សាជាថ្មី ក្នុងចំណោមអ្នកទាំងឡាយដែលអស់សង្ឃឹមសម្រាប់ការត្រឡប់ទៅរកប្រក្រតីភាពវិញ។