រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយថា “មានផ្លូវមួយ” ឆ្ពោះទៅកាន់កិច្ចព្រមព្រៀងជាមួយចិន ជុំវិញការដំឡើងពន្ធ បន្ទាប់ពីលោកទាក់ទងជាមួយសមភាគីចិន កាលពីសប្តាហ៍មុន នៅទីក្រុងវ៉ាស៊ីនតោន ប៉ុន្តែការពិភាក្សានោះមិនបាននិយាយពីការប្រឈមមុខដាក់គ្នាជុំវិញពន្ធរបស់លោកប្រធានាធិបតីអាមេរិក Donald Trump ទេ។

មានសញ្ញាមិនត្រូវគ្នា ជុំវិញសង្គ្រាមពាណិជ្ជកម្មរវាងអាមេរិក និងចិន ដោយលោក Trump បាននិយាយនៅថ្ងៃសុក្រសប្ដាហ៍មុនថា ការចរចាកំពុងកើតឡើង ប៉ុន្តែចិន ក្រោយមកបានបដិសេធថាមិនកើតឡើងទេ។ មួយថ្ងៃក្រោយមកទៀត រដ្ឋមន្ត្រីការបរទេសចិន លោក Wang Yi បាននិយាយថា ទីក្រុងប៉េកាំង គោរពតាមច្បាប់អន្តរជាតិ ស្តីពីពន្ធដែលដាក់ដោយអាមេរិក ហើយនឹងស្វែងរកសាមគ្គីភាពជាមួយប្រទេសដទៃ។

លោក Bessent បានប្រាប់បទសម្ភាស៍ ABC News កាលពីថ្ងៃអាទិត្យថា "រូបលោកបានទាក់ទងជាមួយសមភាគីចិន ប៉ុន្តែភាគច្រើនលើរឿងស្ថិរភាពហិរញ្ញវត្ថុ និងការព្រមានពីសេដ្ឋកិច្ចពិភពលោកប៉ុណ្ណោះ ហើយលោកក៏មិនដឹងដែរថា លោក Trump បានសន្ទនាជាមួយលោកប្រធានាធិបតីចិន Xi Jinping ដែរឬអត់"។ យ៉ាងណាក្ដី លោកបន្តថា “ផ្លូវមួយដែលនឹងកាត់បន្ថយភាពតានតឹងពាណិជ្ជកម្មកំពុងកើតមានឆ្ពោះទៅរកកិច្ចព្រមព្រៀងជាគោលការណ៍ ប៉ុន្តែក៏ព្រមានថា "កិច្ចព្រមព្រៀងពាណិជ្ជកម្មអាចចំណាយពេលច្រើនខែ"។

ការអត្ថាធិប្បាយរបស់លោក Bessent កើតឡើងស្របពេលដែលមានសេចក្ដីរាយការណ៍ថា អ្នកលក់រាយធំៗរបស់សហរដ្ឋអាមេរិក បានព្រមានសេតវិមានថា ពន្ធគយនឹងធ្វើឱ្យធ្នើហាងលក់ទំនិញទទេស្អាត ហើយតម្លៃទំនិញនឹងឡើងកប់ពពកក្នុងប៉ុន្មានសប្តាហ៍ខាងមុខ៕