នៅក្នុងឱកាសអញ្ជើញសំណេះសំណាលជាមួយថ្នាក់ដឹកនាំអង្គការវិជ្ជាជីវៈក្នុងឱកាសខួបអនុស្សាវរីយ៍លើកទី១៣៩ ទិវាពលកម្មអន្តរជាតិ ១ ឧសភា នៅថ្ងៃទី២៧ ខែមេសា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍បញ្ជាក់ថា រយៈពេល ១៩ខែមកនេះ រាជរដ្ឋាភិបាលអាណត្តិទី៧ បានឆ្លងកាត់វិញ្ញាសាលំបាកៗច្រើនណាស់ តែរដ្ឋាភិបាល ធ្វើបានល្អដោយរក្សាបាននូវកំណើនសេដ្ឋកិច្ចជាតិ និងរក្សាបាននូវសុខសន្ដិភាពជូនដល់ប្រជាពលរដ្ឋ។

សម្ដេចធិបតី នាយករដ្ឋមន្រ្ដីមានប្រសាសន៍ថាអ្នកនយោបាយក្រៅប្រទេសមួយក្ដាប់តូចតែងតែចោទប្រកាន់ និងបន្ទោសចំពោះការអនុវត្តការងាររបស់រាជរដ្ឋាភិបាល ប៉ុន្តែរាជរដ្ឋាភិបាលមានតួនាទី និងកាតព្វកិច្ចគិតគូរពីប្រយោជន៍របស់ប្រជាពលរដ្ឋ កម្មករនិយោជិត និងស្ថានភាពការងារនៅកម្ពុជា។

សម្ដេចនាយករដ្ឋមន្ត្រី បានថ្លែងថា ក្រុមប្រឆាំងជ្រុលនិយមនៅក្រៅប្រទេស ពួកគេតែងតែនាំគ្នារំលេចចេញនូវកន្លែងណាដែលខ្សោយដែលរាជរដ្ឋាភិបាលបានធ្វើ ប៉ុន្ដែកន្លែងណាជាសមិទ្ធផលអនុវត្តបានល្អពួកគេមិនដែលរំលេចទេ។ សម្ដេចមានប្រសាសន៍ថា រាជរដ្ឋាភិបាលខិតខំធ្វើ ដូចជាករណីឆ្នាំទៅស្រូវឡើងថ្លៃ ខិតខំដោះស្រាយជូនពលរដ្ឋបានល្អ តែក្រុមជ្រុលនិយមបែរជាទៅថតព្រលានយន្តហោះសៀមរាបថា អសមត្ថភាព អត់មានទេសចរ, ដល់ឆ្នាំនេះទេសចរមកលេងកម្សាន្តច្រើន ពួកគេមិនទៅថតទេសចរនៅសៀមរាប បែរជាទៅថតរឿងស្រូវម្ដង។

ក្នុងឱកាសនោះ សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់ជូនប្រជាពលរដ្ឋឱ្យជឿទុកចិត្តរឿងពាណិជ្ជកម្មជាមួយអាមេរិក រឿងដោះស្រាយការងារធ្វើជូនពលរដ្ឋដោយរាជរដ្ឋាភិបាលតែងតែគិតគូរ និងខិតខំការពារអត្ថប្រយោជន៍សម្រាប់បងប្អូនជានិច្ច។ សម្ដេចសង្កត់ធ្ងន់ថា រាជរដ្ឋាភិបាលប្រឈមការលំបាកខ្លះ ប៉ុន្តែមិនស្លាប់នោះទេ ផ្ទុយទៅវិញនឹងខិតខំពង្រឹងសក្ដានុពលធ្វើពិពិធកម្មសេដ្ឋកិច្ចរបស់កម្ពុជា នាំចេញទៅអឺរ៉ុប ឬទៅបណ្ដាប្រទេសផ្សេងៗ ព្រោះបញ្ហាអ្វីក៏ដោយដែលមិនធ្វើឱ្យយើងស្លាប់ នឹងធ្វើឱ្យយើងរឹងមាំ៕ អត្ថបទ៖ វ៉ន ដារ៉ា