ទីភ្នាក់ងារសារព័ត៌មាន Yonhap បានរាយការណ៍ថា មនុស្សយ៉ាងហោចណាស់ ៦នាក់ បានរងរបួស រួមទាំងគ្រូបង្រៀនម្នាក់ បន្ទាប់ពីសិស្សម្នាក់នៅវិទ្យាល័យ Cheongju របស់កូរ៉េខាងត្បូង បានប្រើកាំបិតដេញចាក់ហ្វូងមនុស្សនៅថ្ងៃចន្ទ ២៨ មេសា នេះ។

Yonhap បានឱ្យដឹងថា ជនជាប់សង្ស័យនោះគឺជាសិស្សម្នាក់នៃកម្មវិធីអប់រំពិសេស ដែលត្រូវបានរៀបចំឡើងសម្រាប់សិស្សមានពិការភាព ឬតម្រូវការពិសេស។ ការវាយប្រហារនេះបានកើតឡើងនៅម៉ោងប្រហែល ៨:៤០ព្រឹកថ្ងៃចន្ទ (ម៉ោងក្នុងស្រុក) នៅក្នុងទីក្រុង Cheongju ដែលមានចម្ងាយប្រហែល ១១០គីឡូម៉ែត្រ ភាគខាងត្បូងរដ្ឋធានីសេអ៊ូល។

តាមសេចក្ដីរាយការណ៍បានឱ្យដឹងថា យ៉ាងហោចណាស់មនុស្ស ៣នាក់បានរងរបួសធ្ងន់ ខណៈ ៣នាក់ផ្សេងទៀតរងរបួសស្រាល ហើយជនរងគ្រោះទាំងអស់ត្រូវបានបញ្ជូនទៅមន្ទីរពេទ្យដោយមានរបួសលើមុខ ពោះ និងផ្នែកផ្សេងទៀត ខណៈកំពុងព្យាបាលនៅទីនោះ។

នគរបាល Cheongju បានឱ្យដឹងថា សិស្សដែលជាជនដៃដល់នោះបានព្យាយាមរត់គេច ប៉ុន្តែក៏ត្រូវបានចាប់ខ្លួនវិញ ហើយកំពុងសម្រាកព្យាបាលនៅមន្ទីរពេទ្យ។ មូលហេតុនៃឧបទ្ទវហេតុនេះនៅមិនទាន់ដឹងនៅឡើយទេ ខណៈនគរបាល និងអាជ្ញាធរអប់រំ កំពុងស៊ើបអង្កេត និងពិនិត្យមើលករណីជាក់ស្តែង ដែលនាំទៅដល់ករណីដេញចាក់នេះ៕