ក្រសួងការពារជាតិរុស្សី បាននិយាយនៅក្នុងសេចក្តីថ្លែងការណ៍មួយថា នាវាមុជទឹកដើរដោយថាមពលនុយក្លេអ៊ែរ Krasnoyarsk បានវាយប្រហារគោលដៅឆ្នេរមួយ នៅកន្លែងបាញ់តេស្តសាកល្បងមីស៊ីល Kura នៅឧបទ្វីប Kamchatka ពីចម្ងាយជាង ១.១០០គីឡូម៉ែត្រ ក្នុងអំឡុងពេលធ្វើសមយុទ្ធជាប្រចាំ នៅមហាសមុទ្រប៉ាស៊ីហ្វិក។

សេចក្តីថ្លែងការណ៍ បានឲ្យដឹងថា៖«នាវាមុជទឹកដើរដោយថាមពលនុយក្លេអ៊ែរ Krasnoyarsk របស់កងនាវាប៉ាស៊ីហ្វិក បានផ្លាស់ទីតាំងដោយសម្ងាត់ ទៅកាន់តំបន់ដែលបានកំណត់ នៅក្នុងមហាសមុទ្រប៉ាស៊ីហ្វិក ដើម្បីបាញ់មីស៊ីល Kalibr ទៅលើគោលដៅឆ្នេរសមុទ្រ។ មីស៊ីលតម្រង់គោលដៅ បានបាញ់ដល់គោលដៅឆ្នេរ នៅកន្លែងបាញ់តេស្តសាកល្បងមីស៊ីល Kura នៅឧបទ្វីប Kamchatka ដោយជោគជ័យ។ ចម្ងាយទៅដល់គោលដៅនោះ លើសពី ១.១០០ គីឡូម៉ែត្រ»។

ក្នុងដំណាក់កាលទី២ នៃសមយុទ្ធ នាវាមុជទឹក Krasnoyarsk បានបំពេញបេសកកម្មស្វែងរកនាវាមុជទឹករបស់សត្រូវ ហើយបានវាយប្រហារវាដោយគ្រាប់រ៉ូកែត torpedo ។ យោងតាមទិន្នន័យគ្រប់គ្រងគោលដៅ ក្បាលគ្រាប់ បានវាយប្រហារទៅលើគោលដៅក្រោមទឹក។

តំបន់សមយុទ្ធនេះ ត្រូវបានបិទមិនឲ្យនាវាស៊ីវិល និងយន្តហោះចេញចូល។

នាវា Krasnoyarsk ដែលជានាវាមុជទឹកដើរដោយថាមពលនុយក្លេអ៊ែរទី២នៃគម្រោង 885M Yasen-M ត្រូវបានសាងសង់ នៅកន្លែងសង់ Sevmash។ នាវាមុជទឹកនេះ បានចូលរួមជាមួយកងទ័ពជើងទឹករុស្ស៊ី ក្នុងខែធ្នូ ឆ្នាំ ២០២៣។