សហភាពអាហ្រ្វិក(AU)បានអំពាវនាវឲ្យមានកិច្ចសហប្រតិបត្តិការជាបន្ទាន់ ដើម្បីដោះស្រាយអំពើហិង្សាជ្រុលនិយម នៅក្នុងតំបន់ Sahel បន្ទាប់ពីមានការវាយប្រហារថ្មីៗនេះ ដែលត្រូវស្តីបន្ទោសទៅលើក្រុម សកម្មប្រយុទ្ធ បានសម្លាប់ទាហានចំនួន ៥៤នាក់ នៅភាគខាងជើងប្រទេសបេនីន។

តំបន់ដែលមានព្រំប្រទល់ជាប់ទាំងប្រទេសនីហ្សេ និងប៊ួគីណាហ្វាសូ បានឃើញការកើនឡើងនៃការវាយប្រហារនាពេលថ្មីៗនេះ សំដៅលើទីតាំងកងទ័ព ហើយនៅថ្ងៃទី ១៧ខែមេសា ត្រូវគេសង្ស័យថា ក្រុមជ្រុលនិយម បានវាយប្រហារលើប៉ុស្តិ៍យោធា នៅក្នុងឧទ្យានជាតិមួយ។

រដ្ឋាភិបាលរបស់ប្រទេសបេនីន បានស្តីបន្ទោសការវាយប្រហារនេះថា បានផ្ទុះចេញពីប្រទេសនីហ្សេ និង បួគីណាហ្វាសូ ដែលប្រទេសទាំងពីរ ត្រូវបានគ្រប់គ្រងដោយមន្ត្រីកងទ័ព ដែលបានឡើងកាន់អំណាច ក្នុងរដ្ឋប្រហារ ដោយបានបង្ក្រាបការវាយលុករបស់ក្រុមជ្រុលនិយម ដែលអូសបន្លាយយូរមកហើយ នៅក្នុងតំបន់ Sahel។

ប្រធានគណៈកម្មការសហភាពអាហ្រ្វិក( AU) លោក Mahamoud Ali Youssouf បានថ្កោលទោសការវាយប្រហារចុងក្រោយនេះ ហើយបានហៅវាថា ជា«ទង្វើដ៏កំសាក»។

សេចក្តីថ្លែងការណ៍មួយ បានឲ្យដឹងថា ការវាយប្រហារនេះ «គូសបញ្ជាក់ពីតម្រូវការបន្ទាន់សម្រាប់ការពង្រឹងកិច្ចសហប្រតិបត្តិការរវាងរដ្ឋជិតខាង ដើម្បីដោះស្រាយការគំរាមកំហែងកាន់តែខ្លាំងឡើង ដែលបង្កឡើងដោយក្រុមភេរវករ ដែលកំពុងប្រតិបត្តិការ នៅតំបន់ Sahel»។