ឥណ្ឌា បាននិយាយនៅថ្ងៃចន្ទ (២៨ មេសា) នេះថា ខ្លួនបានឆ្លើយតបទៅនឹងការបាញ់ប្រហារ 'មិនបង្កហេតុ' ពីប៉ាគីស្ថាន នៅព្រំដែនតាមជាក់ស្ដែងរវាងភាគីទាំងពីរ សម្រាប់យប់ទី៤ ជាប់ៗគ្នា ខណៈទីក្រុងដេលី បង្កើនការស្វែងរកពួកសកម្មប្រយុទ្ធនៅក្នុងតំបន់ បន្ទាប់ពីការវាយប្រហារដ៏អាក្រក់កាលពីសប្តាហ៍មុន លើអ្នកទេសចរនៅតំបន់កាស្មៀរ។

បន្ទាប់ពីការវាយប្រហារកាលពីថ្ងៃទី២២ ខែមេសា ដែលបានសម្លាប់មនុស្ស ២៦នាក់មក ឥណ្ឌាបានកំណត់អត្តសញ្ញាណជនភេរវករ ២នាក់ក្នុងចំណោម ៣នាក់ដែលសង្ស័យថាជាជនជាតិប៉ាគីស្ថាន ខណៈទីក្រុងអ៊ីស្លាម៉ាបាដ បានបដិសេធការជាប់ពាក់ព័ន្ធ និងអំពាវនាវឱ្យមានការស៊ើបអង្កេតអព្យាក្រឹត។

កងទ័ពឥណ្ឌា និយាយថា ខ្លួនបានឆ្លើយតបទៅនឹងការបាញ់ប្រហារក្នុងទ្រង់ទ្រាយតូច "ដែលមិនបង្កហេតុ" ពីប៉ុស្តិ៍កងទ័ពប៉ាគីស្ថានជាច្រើន នៅជុំវិញពាក់កណ្តាលអធ្រាត្រនៅថ្ងៃអាទិត្យ តាមបណ្តោយព្រំដែនជាក់ស្ដែង ៧៤០គីឡូម៉ែត្រនៃតំបន់កាស្មៀរ ដែលខណ្ឌចែកឥណ្ឌា និងប៉ាគីស្ថាន ដោយមិនផ្តល់ព័ត៌មានលម្អិតបន្ថែមទៀតទេ ហើយក៏ពុំមានអ្នកស្លាប់ និងរបួសត្រូវរាយការណ៍ដែរ។

ចំណែកយោធាប៉ាគីស្ថានមិនបានឆ្លើយតបនឹងសំណើសុំការអត្ថាធិប្បាយទេ។ មន្ត្រីនគរបាលក្នុងតំបន់បានប្រាប់សារព័ត៌មានរ៉យទ័រនៅថ្ងៃចន្ទនេះថា កងកម្លាំងសន្តិសុខឥណ្ឌាបានឃុំខ្លួនមនុស្សប្រហែល ៥០០នាក់ ដើម្បីសាកសួរ បន្ទាប់ពីពួកគេបានឆែកឆេរលំនៅឋាន និងព្រៃឈើជិត ១.០០០ទីតាំង ខណៈពួកគេកំពុងតាមប្រមាញ់ក្រុមសកម្មប្រយុទ្ធនៅតំបន់កាស្មៀរ៕