អ្នកនាំពាក្យក្រសួងការបរទេស នៅថ្ងៃចន្ទ (ទី២៨ ខែមេសា) នេះ បានប្រាប់ឲ្យដឹងថា ក្រុមបច្ចេកទេសមកពីទីភ្នាក់ងារថាមពលអាតូមិកអន្តរជាតិ (IAEA) បានមកដល់ប្រទេសអ៊ីរ៉ង់ហើយ ដើម្បីបើកកិច្ចពិភាក្សាជាមួយអ្នកជំនាញនុយក្លេអ៊ែរ ជាការបន្តធ្វើកិច្ចការបន្ថែមពីដំណើរទស្សនកិច្ចរបស់ប្រមុខស្ថាប័នឃ្លាំមើលនុយក្លេអ៊ែររបស់អង្គការសហប្រជាជាតិ (UN) ទៅកាន់ទីក្រុងតេអេរ៉ង់ នៅដើមខែនេះ។

អំឡុងសន្និសីទសារព័ត៌មានប្រចាំសប្តាហ៍ លោក Esmaeil Baghaei បាននិយាយថា៖ «គណៈប្រតិភូបានមកដល់ប្រទេសអ៊ីរ៉ង់ហើយ ហើយនឹងបើកកិច្ចពិភាក្សាបច្ចេកទេសជាមួយអ្នកជំនាញអ៊ីរ៉ង់ នៅថ្ងៃនេះ ក្នុងនោះរួមទាំងការជជែកអំពីការការពារសុវត្ថិភាពផងដែរ»។

គួរដឹងថា កាលពីសប្តាហ៍មុន អ៊ីរ៉ង់ និងសហរដ្ឋអាមេរិក បានធ្វើកិច្ចចរចានុយក្លេអ៊ែរជុំទី៣ នៅប្រទេសអូម៉ង់ ជាកន្លែងដែលការពិភាក្សាកម្រិតបច្ចេកទេស ក៏ត្រូវបានធ្វើឡើងផងដែរ។ បន្ទាប់ពីបញ្ចប់ការពិភាក្សាទាំងនេះ រដ្ឋមន្ត្រីការបរទេសអ៊ីរ៉ង់ បានប្រាប់ថា អ្នកជំនាញ IAEA អាចនឹងចូលរួមជុំបន្ទាប់នៃការជជែកគ្នាអ៊ីរ៉ង់-អាមេរិក។ កិច្ចពិភាក្សានុយក្លេអ៊ែរ គ្រោងធ្វើឡើងនៅថ្ងៃសៅរ៍។

អំឡុងទស្សនកិច្ចនៅទីក្រុងតេអេរ៉ង់ កាលពីថ្ងៃទី១៧ ខែមេសា ប្រមុខ IAEA លោក Rafael Grossi បាននិយាយថា ទីភ្នាក់ងាររបស់លោកអាចជួយសម្រេចបានលទ្ធផលវិជ្ជមាន ក្នុងដំណើរការចរចា៕