លោកប្រធានាធិបតីរុស្ស៊ី Vladimir Putin បានប្រកាសឈប់បាញ់ជាបណ្តោះអាសន្នសម្រាប់សង្គ្រាមនៅអ៊ុយក្រែន។

វិមានក្រឹមឡាំងបាននិយាយថា បទឈប់បាញ់នឹងដំណើរការចាប់ពីព្រឹកថ្ងៃទី ៨ ឧសភា រហូតដល់ថ្ងៃទី ១១ ឧសភា ដែលស្របពេលជាមួយការប្រារព្ធទិវាជ័យជម្នះ ដើម្បីរំលឹកដល់ការបញ្ចប់សង្គ្រាមលោកលើកទីពីរដែលមានរយៈពេល៨០ឆ្នាំមកដល់ពេលនេះ ។

ជាការឆ្លើយតប រដ្ឋមន្ត្រីការបរទេសអ៊ុយក្រែន លោក Andrii Sybiha បានអំពាវនាវឱ្យមានបទឈប់បាញ់ជាបន្ទាន់ដែលមានរយៈពេលយ៉ាងតិច ៣០ថ្ងៃ។

សេតវិមានបាននិយាយថា ស្របពេលលោកប្រធានាធិបតីអាមេរិក Donald Trump ដែលបាននិងកំពុងប៉ុនប៉ងធ្វើអន្តរការីបទឈប់បាញ់រវាងភាគីទាំងពីរបាននិយាយថារូបលោកចង់ឃើញបទឈប់បាញ់ជាអចិន្ត្រៃយ៍។

វិមានក្រឹមឡាំងបានប្រកាសបទឈប់បាញ់ ៣០ ម៉ោងស្រដៀងគ្នានេះ សម្រាប់បុណ្យអ៊ីស្ទើរ ប៉ុន្តែ ខណៈភាគីទាំងពីរបានរាយការណ៍ពីការប្រយុទ្ធគ្នា ប្រទេសទាំងពីរបានចោទប្រកាន់គ្នាទៅវិញទៅមកពីការរំលោភបទឈប់បាញ់រាប់រយលើក។

បទឈប់បាញ់ត្រូវបានព្យាយាមជាង២០ដងនៅក្នុងប្រទេសអ៊ុយក្រែន តែភាគីទាំងពីរបានបរាជ័យ ហើយការវាយប្រយុទ្ធគ្នាខ្លះទៀតបានផ្ទុះឡើងវិញក្នុងរយៈពេលប៉ុន្មាននាទីក្រោយការចូលជាធរមាន។កាលពីថ្ងៃអាទិត្យ ២៧ មេសា ប្រធានាធិបតីDonald Trump បានជំរុញរុស្ស៊ី ឱ្យបញ្ឈប់ការវាយប្រហាររបស់ខ្លួនក្នុងប្រទេសអ៊ុយក្រែន ខណៈប្រមុខការទូតរបស់អាមេរិក ក៏បានគំរាមជាថ្មីផងដែរថា ទីក្រុងវ៉ាស៊ីនតោន អាចនឹងដើរចេញពីកិច្ចខិតខំប្រឹងប្រែងសន្តិភាពនេះ បើគ្មានវឌ្ឍនភាពទេនោះ៕