អ៊ីរ៉ង់ បានចោទប្រកាន់អ៊ីស្រាអែលពីបទព្យាយាមបំផ្លាញការចរចា ខណៈការចរចាជាមួយសហរដ្ឋអាមេរិកជុំវិញកម្មវិធីនុយក្លេអ៊ែររបស់ក្រុងតេអេរ៉ង់ ទំនងមានវឌ្ឍនភាព។

រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយកាលពីថ្ងៃចន្ទដើមសប្ដាហ៍នេះថា នាយករដ្ឋមន្ត្រីអ៊ីស្រាអែល លោក Benjamin Netanyahu កំពុងបង្គាប់បញ្ជានូវអ្វីដែលប្រធានាធិបតីអាមេរិក លោក Donald Trump អាចធ្វើបាន និងមិនអាចធ្វើបាន នៅក្នុងទំនាក់ទំនងការទូតរបស់ខ្លួនជាមួយអ៊ីរ៉ង់ ។

ជាការឆ្លើយតបទៅនឹងការចរចារជុំទី ៣ រវាងសហរដ្ឋអាមេរិក និងអ៊ីរ៉ង់ ដែលហាក់ដូចជាមានសន្ទុះវិជ្ជមានច្រើនក្នុងប្រទេសអូម៉ង់កាលពីចុងសប្តាហ៍កន្លងទៅ លោក Netanyahu បានទាមទារម្តងទៀត ថា កម្មវិធីនុយក្លេអ៊ែររបស់អ៊ីរ៉ង់ត្រូវតែ ត្រូវបានលុបបំបាត់ទាំងស្រុង។

ថ្មីៗ នេះ លោក Araghchi បានបង្ហាញពីសុទិដ្ឋិនិយមប្រុងប្រយ័ត្ន បន្ទាប់ពីកិច្ចពិភាក្សាសម្របសម្រួលដោយប្រទេសអូម៉ង់ កាលពីថ្ងៃសៅរ៍កន្លងទៅ ជាមួយបេសកជនមជ្ឈិមបូព៌ារបស់សហរដ្ឋអាមេរិក លោក Steve Witkoff ។ សារព័ត៌មាន Axios បានរាយការណ៍កាលពីថ្ងៃសៅរ៍ ២៦ មេសា ដោយដកស្រង់សម្តីមន្ត្រីអាមេរិកមួយរូបថា កិច្ចចរចានុយក្លេអ៊ែរជុំទី៤ រវាងសហរដ្ឋអាមេរិក និងអ៊ីរ៉ង់ នឹងប្រព្រឹត្តទៅនៅថ្ងៃទី០៣ ខែឧសភា ខាងមុខនេះ នៅលើទឹកដីអឺរ៉ុប។

ការចរចាមានគោលបំណងធានាថា អ៊ីរ៉ង់ មិនប្រើកម្មវិធីនុយក្លេអ៊ែររបស់ខ្លួនដើម្បីអភិវឌ្ឍអាវុធឡើយ។ ជាការដោះដូរ ទីក្រុងតេអេរ៉ង់ នឹងទទួលបានភាពធូរស្រាលពីទណ្ឌកម្មអន្តរជាតិ។

មន្ត្រីជាន់ខ្ពស់អាមេរិកមួយរូប បានរាយការណ៍ថា វឌ្ឍនភាពបន្ថែមទៀត ត្រូវបានធ្វើឡើងកាលពីចុងសប្តាហ៍កន្លងទៅ នេះបើយោងតាមទីភ្នាក់ងារសារព័ត៌មាន Reuters ៕