ប្រភពពីអ្នកការទូតចំនួន ៤រូប បាននិយាយកាលពីថ្ងៃចន្ទ (២៨ មេសា) ថា អ៊ីរ៉ង់ បានស្នើសុំជួបប្រជុំជាមួយភាគីអឺរ៉ុប ស្ដីពីកិច្ចព្រមព្រៀងនុយក្លេអ៊ែរឆ្នាំ២០១៥ ដែលអាចកើតឡើងនៅទីក្រុងរ៉ូម របស់អ៊ីតាលី នៅថ្ងៃសុក្រ ០២ ឧសភា ខាងមុខនេះ ខណៈការចរចាជុំទី៤ ជាមួយសហរដ្ឋអាមេរិក អាចបន្តនៅថ្ងៃ០៣ ឧសភា ដោយព្រមានថា មិនទាន់មានការឆ្លើយតបពីអឺរ៉ុបចំពោះគំនិតនេះនៅឡើយទេ។

អ៊ីរ៉ង់ កំពុងចង់កសាងសន្ទុះនៃកិច្ចចរចានុយក្លេអ៊ែរជាមួយអាមេរិក ដែលបានចាប់ផ្តើមឡើងវិញជុំទី៣ ក្នុងប្រទេសអូម៉ង់ កាលពីថ្ងៃសៅរ៍ចុងសប្ដាហ៍មុន និងបន្ទាប់ពីកិច្ចពិភាក្សាជាមួយរុស្ស៊ី និងចិន កាលពីសប្តាហ៍មុនដូចគ្នានេះ។ មន្ត្រីអូម៉ង់ បាននិយាយថា ការចរចាជុំទី៤ ថ្មីរវាងអាមេរិក និងអ៊ីរ៉ង់ អាចនឹងធ្វើឡើងនៅថ្ងៃទី០៣ ខែឧសភា នៅអឺរ៉ុប ប៉ុន្តែពុំទាន់មានការសម្រេចចិត្តជាផ្លូវការនោះទេ។

អ៊ីរ៉ង់ បានងាកទៅរកចក្រភពអង់គ្លេស បារាំង និងអាល្លឺម៉ង់ ដែលត្រូវគេស្គាល់ថាមហាអំណាចអឺរ៉ុបទាំងបី E3 ដោយចង់ឱ្យខ្លួនមានជម្រើសច្រើន ប៉ុន្តែក៏ចង់វាយតម្លៃថាជំហរអឺរ៉ុបនៅទីតាំងណា ស្តីពីការដាក់ទណ្ឌកម្មឡើងវិញរបស់អង្គការសហប្រជាជាតិ ដែលអាចធ្វើទៅបានមុនខែតុលា នៅពេលដំណោះស្រាយផ្តល់សច្ចាប័នលើកិច្ចព្រមព្រៀងឆ្នាំ២០១៥ ផុតកំណត់។ មន្ត្រីអ៊ីរ៉ង់បានបញ្ជាក់ពីសំណើសុំជួបភាគី E3 នៅថ្ងៃទី០២ ឧសភានោះ ប៉ុន្តែក៏និយាយថា E3 មិនទាន់ឆ្លើយតបទេរហូតមកដល់ពេលនេះ៕