លោកនាយករដ្ឋមន្ត្រីជប៉ុន Shigeru Ishiba និងលោកនាយករដ្ឋមន្ត្រីវៀតណាម Pham Minh Chinh កាលពីថ្ងៃចន្ទដើមសប្ដាហ៍នេះ បានព្រមព្រៀងរក្សារបបពាណិជ្ជកម្មសេរីចំពោះមុខសង្គ្រាមដំឡើងពន្ធដោយសហរដ្ឋអាមេរិក ខណៈក៏បង្កើតក្របខ័ណ្ឌ "ពីរបូកពីរ" ដើម្បីបង្កើនកិច្ចសហប្រតិបត្តិការសន្តិសុខផងដែរ នេះបើយោងតាមរបាយការណ៍ប្រព័ន្ធផ្សព្វផ្សាយ។

ប្រព័ន្ធផ្សព្វផ្សាយបានរាយការណ៍ថាលោក Ishiba ក៏ត្រូវបានរំពឹងថានឹងទៅបំពេញទស្សនកិច្ចនៅប្រទេសហ្វីលីពីន និងពិភាក្សាអំពីការចែករំលែកព័ត៌មានចារកម្ម និងកិច្ចសហប្រតិបត្តិការឆ្មាំល្បាតឆ្នេរ ផងដែរ អំឡុងពេលដំណើររបស់លោក។

ក្រុមអ្នកវិភាគបាននិយាយថា ប្រទេសជប៉ុន កំពុងឈោងចាប់បណ្ដាប្រទេសអាស៊ាន ដើម្បីកាត់បន្ថយសម្ពាធពន្ធពីសហរដ្ឋអាមេរិក។ ទោះយ៉ាងណាក៏ដោយ ពួកគេបានព្រមានថា កិច្ចសហប្រតិបត្តិការសន្តិសុខរបស់ទីក្រុងតូក្យូនៅក្នុងតំបន់ មិនគួរជាការកំណត់គោលដៅភាគីទីបីណាមួយឡើយ ។

លោកនាយករដ្ឋមន្ត្រីជប៉ុន បានទៅដល់ប្រទេសវៀតណាមកាលពីថ្ងៃទី២៧ខែមេសា។ យោងតាមសារព័ត៌មានជប៉ុន Asahi ទាំងលោក Ishiba ទាំងលោក Chinh បានអះអាងពីការប្តេជ្ញាចិត្តរបស់ខ្លួនក្នុងការ ធ្វើកិច្ចសហប្រតិបត្តិការក្នុងសហគមន៍អន្តរជាតិ ដោយរួមចំណែកក្នុងការថែរក្សា និងពង្រឹងសណ្តាប់ធ្នាប់អន្តរជាតិដោយសេរី និងបើកចំហដោយផ្អែកលើនីតិរដ្ឋ។

ប្រព័ន្ធផ្សព្វផ្សាយជប៉ុនដដែលបាននិយាយថា នៅក្នុងតំបន់សន្តិសុខ លោក Ishiba និងលោក Chinh បានព្រមព្រៀងគ្នាបង្កើតក្របខ័ណ្ឌ "ពីរបូកពីរ" ជាមួយនឹងកិច្ចប្រជុំលើកដំបូងរបស់អនុរដ្ឋមន្ត្រីការបរទេស និងការពារជាតិ ដែលនឹងប្រព្រឹត្តទៅក្នុងប្រទេសជប៉ុននៅចុងឆ្នាំនេះ៕