ប្រជាពលរដ្ឋប៉ាឡេស្ទីនជាជនរងគ្រោះនៅតំបន់ហ្កាហ្សា បានអំពាវនាវដល់តុលាការយុត្តិធម៌អន្តរជាតិ (ICJ) កាលពីថ្ងៃចន្ទ ២៨ មេសា ឲ្យដាក់សម្ពាធលើអ៊ីស្រាអែល បញ្ឈប់សង្គ្រាមលើដែនដីរងការឡោមព័ទ្ធហែកហួរដោយសង្គ្រាមមួយនេះ និងអនុញ្ញាតឱ្យមានជំនួយមនុស្សធម៌ចូល។

អ៊ីស្រាអែល បានប្រឈមការចោទប្រកាន់ពីបទបំពានច្បាប់អន្តរជាតិដោយបដិសេធមិនអនុញ្ញាតឱ្យមានការផ្តល់ជំនួយចូលទៅក្នុងតំបន់ហ្កាហ្សាស្ទ្រីប នៅតុលាការ ICJ នៅពេលចាប់ផ្តើមសវនាការក្នុងទីក្រុងឡាអេ កាលពីថ្ងៃចន្ទ ២៨ មេសាដើមសប្ដាហ៍នេះ។

ក្រុមតំណាងអង្គការសហប្រជាជាតិ និងជនជាតិប៉ាឡេស្ទីនបានបើកសវនាការ ដែលមានប្រទេសរាប់សិបកំពុងចូលរួមក្នុងរយៈពេលមួយសប្តាហ៍។

ចាប់តាំងពីថ្ងៃទី២ ខែមីនាមក អ៊ីស្រាអែល បានកាត់ផ្តាច់ការផ្គត់ផ្គង់ទាំងស្រុងដល់ប្រជាជន ២,៣ លាននាក់នៅតំបន់ហ្កាហ្សាស្ទ្រីប ហើយស្បៀងអាហារដែលស្តុកទុកក្នុងអំឡុងពេលបទឈប់បាញ់នៅដើមឆ្នាំនេះ នៅសល់កាន់តែតិច។

អ៊ីស្រាអែលបានសម្រេចមិនចូលខ្លួនក្នុងសវនាការនៅតុលាការយុត្តិធម៌អន្តរជាតិកាលពីថ្ងៃចន្ទ ២៨ មេសា សម្រាប់ការបង្ហាញហេតុផលលើកាតព្វកិច្ចរបស់ប្រទេសនេះ ក្នុងការជួយសម្រួលជំនួយទៅដល់ដៃពលរដ្ឋប៉ាឡេស្ទីន ក្នុងតំបន់ហ្កាហ្សា។

រដ្ឋមន្ត្រីការបរទេសអ៊ីស្រាអែល លោក Gideon Saar បាននិយាយថា អ៊ីស្រាអែលបានដាក់ជំហររបស់ខ្លួនជាលាយលក្ខណ៍អក្សរទៅកាន់សវនាការ ដែលលោកបានហៅថាជាចំណាត់ការដើម្បីការពារខ្លួន៕