អ៊ីស្រាអែល បានប្រឈមការចោទប្រកាន់ជាច្រើននៅតុលាការពិភពលោក កាលពីថ្ងៃចន្ទ ពីបទបំពានច្បាប់អន្តរជាតិដោយបដិសេធមិនអនុញ្ញាតឱ្យផ្តល់ជំនួយចូលទៅក្នុងតំបន់ហ្កាហ្សា។ ចាប់តាំងពីថ្ងៃទី ២ ខែមីនា អ៊ីស្រាអែល បានកាត់ផ្តាច់ការផ្គត់ផ្គង់ទាំងស្រុងដល់ប្រជាជន២,៣លាននាក់នៅតំបន់ហ្កាហ្សាស្ទ្រីប ជាកន្លែងដែលស្បៀងអាហារត្រូវបានស្តុកទុកក្នុងអំឡុងពេលបទឈប់បាញ់កាលពីដើមឆ្នាំ ដែលស្បៀងទាំងអស់នោះ បានអស់។

ការបើកសវនាការនៅតុលាការយុត្តិធម៌អន្តរជាតិ(ICJ) ទីប្រឹក្សាច្បាប់របស់អង្គការសហប្រជាជាតិ លោក Elinor Hammarskjold បានរាយបញ្ជីកាតព្វកិច្ចរបស់អ៊ីស្រាអែលនៅក្រោមច្បាប់មនុស្សធម៌អន្តរជាតិ ខណៈកំពុងកាន់កាប់អំណាចនៅតំបន់ហ្កាហ្សា។ អ្នកតំណាងប៉ាឡេស្ទីន លោក Ammar Hijazi ក៏បានចោទប្រកាន់អ៊ីស្រាអែលថា បានប្រើប្រាស់ជំនួយជា «អាវុធនៃសង្គ្រាម»។ «វាគឺអ៊ីស្រាអែល ដែលកំពុងធ្វើឲ្យដួលរលំគោលការណ៍ជាមូលដ្ឋាននៃច្បាប់អន្តរជាតិ រួមទាំងកាតព្វកិច្ចរបស់ខ្លួននៅក្រោមធម្មនុញ្ញអង្គការសហប្រជាជាតិ។ វាគឺ អ៊ីស្រាអែល ដែលប្រែក្លាយប៉ាឡេស្ទីន ជាពិសេសតំបន់ហ្កាហ្សា ឲ្យទៅជាផ្នូរដ៏ធំសម្រាប់ពលរដ្ឋប៉ាឡេស្ទីន និងអ្នកដែលបានមកជួយពួកគេ។

រដ្ឋមន្ត្រីការបរទេសអ៊ីស្រាអែល លោក Gideon Saar បានប្រាប់អ្នកសារព័ត៌មាននៅទីក្រុងហ្សេរុយសាឡឹម ថា ប្រទេសរបស់លោក បានដាក់ជំហររបស់ខ្លួនជាលាយលក្ខណ៍អក្សរទៅកាន់សវនាការ ដោយនិយាយថា ខ្លួននឹងមិនចូលរួមជាអ្វីដែលលោកហៅថា «ជាការសម្តែង»។ «វាជាការប៉ុនប៉ងមួយផ្សេងទៀតដើម្បីធ្វើនយោបាយ និងរំលោភលើដំណើរការផ្លូវច្បាប់ ដើម្បីធ្វើបាបអ៊ីស្រាអែល»។

អ៊ីស្រាអែល បាននិយាយថា ខ្លួននឹងមិនអនុញ្ញាតឱ្យជំនួយចូលទៅក្នុងតំបន់ហ្កាហ្សាឡើយ រហូតទាល់តែក្រុមហាម៉ាសដោះលែងចំណាប់ថ្នូរដែលនៅសេសសល់ទាំងអស់។ អ៊ីស្រាអែល បានចោទក្រុមហាម៉ាស ថាបានលួចយកជំនួយមនុស្សធម៌ ដែលក្រុមសកម្មប្រយុទ្ធនេះបានច្រានចោល។ តុលាការជាន់ខ្ពស់របស់អង្គការសហប្រជាជាតិ ត្រូវបានប្រគល់ភារកិច្ចកាលពីក្នុងខែធ្នូ ដើម្បីបង្កើតមតិយោបល់លើកាតព្វកិច្ចរបស់អ៊ីស្រាអែល ក្នុងការសម្របសម្រួលជំនួយដល់ពលរដ្ឋប៉ាឡេស្ទីន។