ជើងឯកពិភពលោក ៧ សម័យ Ronnie O’Sullivan បានបន្តដំណើរឡើងវគ្គ ៨ នាក់ចុងក្រោយការប្រកួតស្នូកឃ័រជើងឯកពិភពលោកហើយ ក្រោយយកឈ្នះកីឡាករចិន Pang Junxu ១២-៤ ហ្វ្រេមនៅវគ្គ ១៦ នាក់ចុងក្រោយ។

         កីឡាករវ័យ ៤៩ ឆ្នាំអង់គ្លេសរូបនេះ បានអវត្តមានពីការប្រកួតជាច្រើនកម្មវិធីរួចមកហើយ មិនបង្ហាញខ្លួននៅការប្រកួតជើងឯកពិភពលោកនេះ ហើយជ័យជំនះលើកីឡាករចិនដោយឈ្នះដាច់ ១២-៤ ហ្វ្រេមនេះ Ronnie O’Sullivan ថាខ្លួនមិនស្ថិតក្នុងទម្រង់លេងល្អឡើយ។

         ហ្វ្រេមចុងក្រោយ Ronnie O’Sullivan ចំណាយពេលត្រឹម ១៧ នាទីប៉ុណ្ណោះដើម្បីយកឈ្នះ។

         កីឡាករដែលជាចំណាប់អារម្មណ៍របស់អ្នកគាំទ្ររូបនេះ បានយកឈ្នះជុំដំបូងលើ Ali Carter ១០-៤ ហ្វ្រេម មុនមកជួប Pang Junxu នេះ។

         វគ្គ ៨ នាក់ចុងក្រោយ O’Sullivan នឹងត្រូវជួបជាមួយកីឡាករចិនមួយរូបទៀត Si Jiahui ដែលបានយកឈ្នះកីឡាករអង់គ្លេស Ben Woollaston ១៣-០ ហ្វ្រេម។

         ងាកមកលទ្ធផលផ្សេងទៀត កីឡាករស្កុតឡេន John Higgins យកឈ្នះកីឡាករចិន Xiao Guidong តានតឹង ១៣-១២ ហ្វ្រេម ឡើងជួបកីឡាករវែល Mark Williams ដែលទម្លាក់កីឡាករអ៊ីរ៉ង់ Hossein Vafaei។

         អតីតជើងឯកកីឡាករប៊ែលហ្ស៊ិក Luca Brecel យកឈ្នះកីឡាករចិន Ding Junhui ១៣-៤ ហ្វ្រេមឡើងជួប Judd Trump ដែលយកឈ្នះ Shaun Murphy ១៣-១០ ហ្វ្រេម៕

អត្ថបទ៖នាង សុភាវុធ