អ្នកស្រុកបាននិយាយថា មនុស្សយ៉ាងហោចណាស់ ២៦នាក់ បានស្លាប់កាលពីថ្ងៃចន្ទ (២៨ មេសា) នៅពេលដែលរថយន្តពីរគ្រឿងបានបំផ្ទុះគ្រឿងរំសេវកែច្នៃនៅក្នុងរដ្ឋ Borno ភាគឦសាននៃប្រទេសនីហ៊្សេយ៉ា ដែលជាចំណុចកណ្ដាលនៃក្រុមបះបោរអ៊ិស្លាមនិយម។

អង្គការសុវត្ថិភាពអន្តរជាតិ ISO ដែលផ្តល់សន្តិសុខដល់អង្គការក្រៅរដ្ឋាភិបាលបរទេសនៅភាគឦសាន បាននិយាយនៅក្នុងអនុស្សរណៈផ្ទៃក្នុងដែលឃើញដោយសារព័ត៌មានរ៉យទ័រថា រថយន្តដែលធ្វើដំណើររវាងទីក្រុង Rann និង Gamboru Ngala បានបុកគ្រឿងផ្ទុះនោះ ដែលបណ្ដាលឱ្យមានការផ្ទុះដ៏ធំកើតឡើង។

ឯកសារនោះនិយាយថា ការបំផ្ទុះនេះបានបណ្តាលឱ្យមនុស្សស្លាប់ ២៦នាក់ និងរបួស ៣នាក់ ប៉ុន្តែនគរបាលរដ្ឋ Borno មិនធ្វើអត្ថាធិប្បាយភ្លាមទេ។

ក្រុមបះបោរអ៊ិស្លាមនិយម Boko Haram និងក្រុមអ៊ិស្លាមនិយមខេត្តអាហ្រ្វិកខាងលិច ISWAP បានប្រយុទ្ធជាមួយកងកម្លាំងសន្តិសុខនីហ៊្សេរីយ៉ា អស់ជាង ១៥ឆ្នាំមកហើយនៅភាគឦសាន ហើយជារឿយៗប្រើប្រាស់ឧបករណ៍បំផ្ទុះដែលកែច្នៃ ដើម្បីដាក់គោលដៅលើជនស៊ីវិល និងកងកម្លាំងសន្តិសុខ៕