រដ្ឋមន្ត្រីការបរទេសមកពីក្រុមប្រទេសកំពុងអភិវឌ្ឍន៍ BRICS បានជួបប្រជុំគ្នា កាលពីថ្ងៃចន្ទ (ទី២៨ ខែមេសា) ដើម្បីពិភាក្សាអំពីការរួមគ្នាការពារប្រព័ន្ធពាណិជ្ជកម្មសកល ដោយរៀបចំការឆ្លើយតបរបស់ពួកគេ ចំពោះការចេញអត្រាពន្ធថ្មីទាំងកំរោលជាបន្តបន្ទាប់របស់ប្រធានាធិបតីអាមេរិក លោក Donald Trump។

កិច្ចប្រជុំនៅទីក្រុង Rio de Janeiro ប្រទេសប្រេស៊ីលនេះ ត្រូវបានគេរំពឹងថា នឹងមានចេញនូវសេចក្តីថ្លែងការណ៍រួមមួយដែលរិះគន់ «វិធានការឯកតោភាគី» លើពាណិជ្ជកម្ម ពីក្រុមប្រទេសដែលបង្កើតឡើងដោយប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ហើយថ្មីៗនេះ បានពង្រីកសមាជិក ដោយរួមបញ្ចូលប្រទេសចំនួន ៦បន្ថែមទៀត។

ឯកអគ្គរដ្ឋទូតប្រេស៊ីល លោក Mauricio Lyrio បាននិយាយថា៖ «រដ្ឋមន្ត្រីនៃប្រទេសរបស់ប្លុកនេះ កំពុងពិភាក្សាលើសេចក្តីប្រកាសមួយ ដើម្បីបញ្ជាក់ឡើងវិញនូវចំណុចសំខាន់នៃការចរចាពាណិជ្ជកម្មពហុភាគីជាអ័ក្សដ៏សំខាន់នៃវិធានការ ក្នុងពាណិជ្ជកម្ម។ រដ្ឋមន្ត្រីទាំងអស់នឹងបញ្ជាក់ឡើងវិញនូវការរិះគន់របស់ពួកលោក ចំពោះវិធានការឯកតោភាគីចេញពីប្រភពដើមណាមួយ ដែលជាជំហរដ៏យូរអង្វែងមកហើយរបស់ក្រុមប្រទេស BRICS»។

ការពង្រីកសមាជិករបស់ក្រុមប្រទេស BRICS ដែលរួមបន្ថែមអេហ្ស៊ីប អារ៉ាប៊ីសាអ៊ូឌីត អេមីរ៉ាតអារ៉ាប់រួម អេត្យូពី ឥណ្ឌូនេស៊ី និងអ៊ីរ៉ង់ កាលពីឆ្នាំមុន ប្រឈមនឹងបញ្ហាធ្ងន់ធ្ងរ ដោយសារវិធានាការពាណិជ្ជកម្មរបស់សហរដ្ឋអាមេរិក។

ប្រទេសចិនដែលរងគ្រោះដោយអត្រពន្ធគយ ១៤៥ភាគរយលើការនាំចេញរបស់ខ្លួនទៅអាមេរិក បានជំរុញឲ្យមានសំឡេងកាន់តែម៉ឺងម៉ាត់ជាងមុននៅក្នុងសេចក្តីថ្លែងការណ៍ ប៉ុន្តែយោងតាមប្រភពដែលស្និទ្ធនឹងការចរចា បានឲ្យដឹងថា អត្ថបទចុងក្រោយនឹងមានលក្ខណៈរិះគន់ ប៉ុន្តែមិនមែនជាការប្រឈមមុខដាក់គ្នានោះទេ។ ក្រុមប្រទេស BRICS ទាំងមូល បានទទួលរងការរិះគន់ពីលោក Trump ដែលបានគំរាមកំហែងដំឡើងពន្ធ ១០០ភាគរយផ្សេងទៀត ប្រសិនបើប្លុកនេះបន្តឆ្ពោះទៅមុខ ដោយប្រើប្រាស់រូបិយប័ណ្ណតែមួយជំនួសឲ្យប្រាក់ដុល្លារក្នុងទំនាក់ទំនងពាណិជ្ជកម្ម៕