អង្គការលើកលែងទោសអន្តរជាតិនៅថ្ងៃអង្គារនេះ បានចោទប្រកាន់អ៊ីស្រាអែលថា បានប្រព្រឹត្ត «អំពើ ប្រល័យពូជសាសន៍ផ្សាយបន្តផ្ទាល់»ប្រឆាំងនឹងជនជាតិប៉ាឡេស្ទីន នៅក្នុងតំបន់ហ្កាហ្សា ដោយការបង្ខំឲ្យ ប្រជាជនភាគច្រើនផ្លាស់ទីលំនៅ និងមានចេតនាបង្កើតគ្រោះមហន្តរាយមនុស្សធម៌។

នៅក្នុងរបាយការណ៍ប្រចាំឆ្នាំរបស់ខ្លួន អង្គការលើកលែងទោសនេះ បានចោទប្រកាន់ថា អ៊ីស្រាអែលបានធ្វើសកម្មភាពដោយ «ចេតនាជាក់លាក់ក្នុងការបំផ្លាញជនជាតិប៉ាឡេស្ទីន នៅតំបន់ហ្កាហ្សា ដូច្នេះហើយបានប្រព្រឹត្តអំពើប្រល័យពូជសាសន៍»។

អ៊ីស្រាអែលបានច្រានចោលការចោទប្រកាន់ពីបទ«ប្រល័យពូជសាសន៍»ពីអង្គការលើកលែងទោស ក្រុមសិទ្ធិមនុស្សផ្សេងទៀត និងរដ្ឋមួយចំនួន នៅក្នុងសង្គ្រាមរបស់ខ្លួន នៅតំបន់ហ្កាហ្សា។

ជម្លោះនេះ បានផ្ទុះឡើង បន្ទាប់ពីក្រុមសកម្មប្រយុទ្ធប៉ាឡេស្ទីន ហាម៉ាសបានវាយប្រហារកាលពីថ្ងៃទី ០៧ ខែតុលា ឆ្នាំ ២០២៣ នៅក្នុងប្រទេសអ៊ីស្រាអែល ដែលបានបណ្តាលឲ្យមនុស្ស ១.២១៨ នាក់ ស្លាប់នៅខាងអ៊ីស្រាអែល ដែលភាគច្រើនជាជនស៊ីវិល។ នេះបើយោងតាមចំនួនបូកសរុបរបស់ទីភ្នាក់ងារសារព័ត៌មាន AFP ដោយផ្អែកលើតួលេខផ្លូវការរបស់អ៊ីស្រាអែល។

ក្រុមសកម្មប្រយុទ្ធ ក៏បានចាប់ពង្រត់មនុស្ស ២៥១នាក់ ដែលក្នុងនោះ ៥៨នាក់ នៅតែត្រូវបានឃុំខ្លួន នៅក្នុងតំបន់ហ្កាហ្សា រួមទាំង ៣៤នាក់ ដែលយោធាអ៊ីស្រាអែល និយាយថា បានស្លាប់។

ជាការឆ្លើយតប អ៊ីស្រាអែលបានបើកការវាយប្រហារឥតឈប់ឈរទៅលើតំបន់ហ្កាហ្សាស្ទ្រីប និងប្រតិបត្តិការថ្មើរជើង ដែលយោងទៅតាមក្រសួងសុខាភិបាលនៅក្នុងទឹកដីដែលគ្រប់គ្រងដោយក្រុមហាម៉ាស បានបណ្តាលឲ្យមនុស្សយ៉ាងហោចណាស់ ៥២.២៤៣នាក់ ស្លាប់។