ប្រធានាធិបតីទួរគីលោក Tayyip Erdogan និយាយថា ប្រទេសរបស់លោកចង់បន្ធូរបន្ថយភាពតានតឹងរវាងប៉ាគីស្ថាន និងឥណ្ឌា ក្រោយការផ្ទុះអាវុធដាក់គ្នាទ្រង់ទ្រាយតូចរវាងភាគីទាំង ២ បន្ទាប់ពីការវាយប្រហារស្លាប់ភ្ញៀវទេសចរកាលពីសប្តាហ៍មុននៅតំបន់កាស្មៀរ ។

លោក Erdogan ថ្លែងបែបនេះនៅក្នុងទីក្រុងអង់ការ៉ា បន្ទាប់ពីជំនួបគណៈរដ្ឋមន្រ្តី ។ នាយករដ្ឋមន្រ្តីប៉ាគីស្ថានលោក Shehbaz Sharif បានជួបលោក Erdogan កាលពីសប្តាហ៍មុននៅទីក្រុងអង់ការ៉ា ។

លោក Erdogan និយាយថា ដំណើរទស្សនកិច្ចរបស់លោក Sharif មកកាន់ប្រទេសរបស់ពួកយើង បានកើតឡើង អំឡុងពេលដ៏រសើបបំផុតនៃដំណើរវិវត្តចុងក្រោយនៅក្នុងតំបន់ ។ ក្រៅពីបញ្ហាពាណិជ្ជកម្ម និងឧស្សាហកម្មការពារជាតិ ពួកយើងបានពិភាក្សាលើកិច្ចសហប្រតិបត្តិការពហុលក្ខណៈរបស់ពួកយើង ។

លោកបន្តថា ពួកយើងបានបញ្ជាក់ឡើងវិញការគាំទ្រដ៏ខ្លាំងក្លារបស់ពួកយើងចំពោះប្រជាពលរដ្ឋប៉ាគីស្ថាន ។ ពួកយើងតែងតែគូសបញ្ជាក់ជានិច្ចថា ពួកយើងមិនចង់បានជម្លោះណាមួយនៅក្នុងតំបន់របស់ពួកយើង ឬនៅតាមតំបន់ឆ្ងាយៗពីពួកយើងនោះឡើយ ។ ពួកយើងចង់ឲ្យមានការបន្ធូរបន្ថយភាពតានតឹងភ្លាមៗ រវាងប៉ាគីស្ថាន និងឥណ្ឌី មុនពេលវាវិវឌ្ឍកាន់តែអាក្រក់ទៅ ។ ក្រសួងការបរទេសរបស់ពួកយើង និងអង្គភាពផ្សេងៗជាច្រើនទៀត កំពុងតាមដានស្ថានភាពមួយនេះ ៕