លោក Moussa Hajj Khalil ស្ថិតនៅក្នុងចំណោមពលរដ្ឋស៊ីរីជាច្រើនទៀត ដែលព្យាយាមសាងសាងផ្ទះរបស់ពួកគេឡើងវិញនៅទីក្រុង Aleppo ស្របពេលដែលមេដឹកនាំថ្មីស៊ីរីពិបាកចាប់ផ្តើមកិច្ចខិតខំកសាងហេដ្ឋារចនាសម្ព័ន្ធទ្រង់ទ្រាយធំឡើងវិញ ។

Aleppo ដែលជាទីក្រុងធំបំផុតទី ២របស់ស៊ីរី និងជាតំបន់បេតិកភណ្ឌពិភពលោករបស់អង្គការ UNESCO រងការបំផ្លិចបំផ្លាញយ៉ាងធ្ងន់ធ្ងរដោយសារសង្រ្គាមរយៈពេលជាង ១ទសវត្សរ៍រវាងកងកម្លាំងរដ្ឋាភិបាល និងក្រុមឧទ្ទាម ដោយទីក្រុងមួយនេះ រងគ្រោះដោយសារសង្រ្គាមជើងគោក ការឡោមព័ទ្ធ ការវាយប្រហារតាមច្រកអាកាសរបស់ស៊ីរី និងការទម្លាក់គ្រាប់បែក ។

បច្ចុប្បន្នប្រជាពលរដ្ឋរស់នៅក្នុងទីក្រុងមួយនេះ បានព្យាយាមស្តាឡើងវិញជីវិតរស់នៅរបស់ពួកគេ តាមមធ្យោបាយផ្ទាល់ខ្លួនរបស់ពួកគេ មិនចង់រង់ចាំគេជួយ និងរង់ចាំមើល ថាតើកិច្ចខិតខំរបស់រដ្ឋាភិបាលថ្មីស៊ីរីដឹកនាំដោយអ៊ិស្លាម ដើម្បីទទួលបានហិរញ្ញប្បទានអន្តរជាតិ នឹងទទួលបានផ្លែផ្កាដែរឬទេ ។

លោក Khalil វ័យ ៦៥ឆ្នាំ ដែលបានចំណាយពេល ៧ឆ្នាំរស់នៅក្នុងជំរំជមនុស្សជម្លៀសខ្លួន ស្ថិតក្នុងទីក្រុង al-Haramain ជាប់ព្រំដែនប្រទេសស៊ីរី-ទួរគី និយាយថា គ្មាននរណាម្នាក់ជួយពួកយើងនោះទេ គ្មានរដ្ឋ គ្មានអង្គការណាៗទាំងអស់ ។

ខណៈឈរមើលជាងជួសជុលផ្ទះរបស់លោកនៅតំបន់ជាយក្រុង Ratyan នៅភាគពាយ័ព្យទីក្រុង Aleppo លោកនិយាយថា ពលរដ្ឋក្រីក្រ បានធ្វើដំណើរមកកាន់ទីនេះ និងព្យាយាមស្តាឡើងវិញបន្ទប់ក្នុងផ្ទះរងការខូចខាតរបស់ពួកគេ ដើម្បីអាចរស់នៅបានជាមួយកូនៗរបស់ពួកគេ ជាជាងបន្តរស់នៅក្នុងជំរំសំពត់តង់ ។

លោក Khalil បានវិលត្រឡប់មកវិញតែម្នាក់ឯងកាលពីរយៈពេល ១ឆ្នាំមុន ដើម្បីជួសជុលផ្ទះរបស់លោកឡើងវិញ មុនពេលលោកអាចនាំគ្រួសាររបស់លោកទាំងអស់ វិលត្រឡប់ចេញពីជំរំ ។

ទីក្រុង Aleppo គឺជាទីក្រុងធំលើកដំបូងគេដែលដណ្តើមកានកាប់ដោយក្រុមឧទ្ទាម ពេលដែលពួកគេបើកការវាយប្រហារលឿនដូចផ្លេកបន្ទោររបស់ពួកគេកាលពីចុងខែវិច្ឆិកា ដើម្បីទម្លាក់តំណែងអតីតមេដឹកនាំ Bashar al-Assad ។

រយៈពេលតិចជាង ២សប្តាហ៍ក្រោយមក លោក Assad ត្រូវបានផ្តួលរំលំ ជាការបញ្ចប់សង្រ្គាមដែលបានសម្លាប់មនុស្សរាប់ម៉ឺននាក់ មនុស្សរាប់លាននាក់ជម្លៀសខ្លួន និងតំបន់ជាច្រើននៅក្នុងប្រទេសស៊ីរី ក្លាយជាគំនរបាក់បែក ៕