រដ្ឋមន្ត្រីក្រសួងព័ត៌មានរបស់ប៉ាគីស្ថាន លោក Attaullah Tarar បានលើកឡើងនៅថ្ងៃពុធ (៣០ មេសា) នេះថា ប៉ាគីស្ថានទទួលបានព័ត៌មានសម្ងាត់គួរឱ្យទុកចិត្ត ដែលថាឥណ្ឌា មានបំណងបើកការវាយប្រហារយោធាក្នុងរយៈពេល ២៤ម៉ោង ទៅ ៣៦ម៉ោងខាងមុខនេះ។

ការព្រមាននេះកើតឡើងនៅពេលភាពតានតឹងកាន់តែក្ដៅគគុករវាងប្រទេសប្រដាប់អាវុធនុយក្លេអ៊ែរទាំងពីរ ខណៈឥណ្ឌា ចោទថាមានការពាក់ព័ន្ធរបស់ប៉ាគីស្ថាន ចំពោះការវាយប្រហារដែលសម្លាប់អ្នកទេសចរ ២៦នាក់នៅតំបន់កាស្មៀរ របស់ឥណ្ឌា កាលពីសប្តាហ៍មុន ដោយនោះជាអ្វីដែលទីក្រុងអ៊ីស្លាម៉ាបាដបដិសេធ ហើយបានអំពាវនាវឱ្យមានការស៊ើបអង្កេតអព្យាក្រឹត។

ចាប់តាំងពីហេតុការណ៍នោះមក រដ្ឋប្រដាប់អាវុធនុយក្លេអ៊ែរជិតខាងទាំងពីរ បានបញ្ចេញនូវវិធានការប្រឆាំងគ្នាទៅមក ដោយឥណ្ឌា បានផ្អាកសន្ធិសញ្ញាតំបន់ទឹក Indus ហើយប៉ាគីស្ថាន បិទដែនអាកាសរបស់ខ្លួនមិនក្រុមហ៊ុនអាកាសចរណ៍ឥណ្ឌាប្រើប្រាស់។

លោក Tarar បាននិយាយលើប្រព័ន្ធផ្សព្វផ្សាយសង្គម X ថា "ប៉ាគីស្ថាន មានព័ត៌មានសម្ងាត់គួរឱ្យទុកចិត្តដែលថាឥណ្ឌា មានបំណងវាយប្រហារយោធាក្នុងពេល ២៤ ទៅ ៣៦ម៉ោងបន្ទាប់ ដោយប្រើលេសមិនពិតនៃឧប្បត្តិហេតុកាស្មៀរ"។ លោកព្រមានថា "ទង្វើនៃការឈ្លានពានណាមួយនឹងត្រូវឆ្លើយតបយ៉ាងម៉ឺងម៉ាត់ ហើយឥណ្ឌានឹងទទួលខុសត្រូវទាំងស្រុងលើផលវិបាកធ្ងន់ធ្ងរណាមួយក្នុងតំបន់"៕