រដ្ឋមន្ត្រីក្រសួងហិរញ្ញវត្ថុអ៊ីស្រាអែល លោក Bezalel Smotrich បានប្ដេជ្ញាកាលពីថ្ងៃអង្គារ (២៩ មេសា) ថា អ៊ីស្រាអែលនឹងបញ្ឈប់ការប្រយុទ្ធរបស់ខ្លួន នៅពេលណាដែលជនជាតិប៉ាឡេស្ទីន "រាប់សែននាក់" ត្រូវបានជម្លៀសដោយបង្ខំចេញពីតំបន់ហ្កាហ្សា ហើយស៊ីរីត្រូវបានបំបែកក្នុងនាមជារដ្ឋរបស់ខ្លួន។

លោក Smotrich បាននិយាយក្នុងសុន្ទរកថាមួយនៅតំបន់កាន់កាប់ West Bank ថា "អ៊ីស្រាអែលនឹងបញ្ចប់យុទ្ធនាការខ្លួន នៅពេលណាដែលស៊ីរីបែកបាក់ ក្រុមហេសបូឡាត្រូវចាញ់ធ្ងន់ធ្ងរ ការគំរាមកំហែងនុយក្លេអ៊ែររបស់អ៊ីរ៉ង់រលាយបាត់ ក្រុមហាម៉ាសត្រូវបោសសម្អាតចេញពីតំបន់ហ្កាហ្សា ហើយប្រជាជនហ្កាហ្សារាប់សែននាក់ត្រូវចេញឱ្យអស់ពីដែនដីនោះទៅកាន់ប្រទេសផ្សេងទៀត”។

សុន្ទរកថារបស់ប្រមុខហិរញ្ញវត្ថុរូបនេះបានបង្ហាញថា ការអំពាវនាវឱ្យផ្លាស់ទីលំនៅដោយបង្ខំរបស់ជនជាតិប៉ាឡេស្ទីនចេញពីតំបន់ហ្កាហ្សាស្ទ្រីប បានចាក់ឫសយ៉ាងជ្រៅនៅក្នុងរដ្ឋាភិបាលអ៊ីស្រាអែល។ អ៊ីស្រាអែលបានបញ្ចុះបញ្ចូលប្រទេសផ្សេងឱ្យទទួលយកជនប៉ាឡេស្ទីន ដែលភៀសខ្លួនដោយបង្ខំ បន្ទាប់ពីខ្លួនបើកប្រតិបត្តិការសឹកក្រោយការវាយប្រហាររបស់ក្រុមហាម៉ាស នៅថ្ងៃទី០៧ ខែតុលា ឆ្នាំ២០២៣ លើភាគខាងត្បូងអ៊ីស្រាអែល ប៉ុន្តែប្រទេសនានាមិនពេញចិត្តនឹងរឿងនេះទេ។

គំនិតនេះទទួលបានសន្ទុះនៅពេលដែលលោកប្រធានាធិបតីអាមេរិក Donald Trump កាលពីខែកុម្ភៈ បានអំពាវនាវឱ្យសម្អាតតំបន់ហ្កាហ្សា និងអាមេរិកជាអ្នកកាន់កាប់ដើម្បីអភិវឌ្ឍឱ្យក្លាយជាតំបន់លំហែកាយដ៏ប្រណីតមួយ។ ទោះយ៉ាងនេះក្ដី ការលើកឡើងហួសពីតំបន់ហ្កាហ្សារបស់លោក Smotrich បានបង្ហាញពីបំណងប្រាថ្នាចង់កែទម្រង់មជ្ឈិមបូព៌ាទាំងមូល៕