ប្រធានគណៈកម្មការអឺរ៉ុប លោកស្រី Ursula von der Leyen កាលពីថ្ងៃអង្គារ ទី២៩ ខែមេសា បានអញ្ជើញអ្នកវិទ្យាសាស្ត្រ និងអ្នកស្រាវជ្រាវ មកពីជុំវិញពិភពលោក ដើម្បីទុកអឺរ៉ុបដូចជាផ្ទះរបស់ពួកគេ ខណៈរដ្ឋបាល របស់លោក Trump គំរាមកាត់មូលនិធិសហព័ន្ធសម្រាប់សាកលវិទ្យាល័យ Harvard និងសាកលវិទ្យាល័យដទៃទៀត នៅសហរដ្ឋអាមេរិក។

លោកស្រី von der Leyen បាននិយាយនៅតំបន់ស្វយ័ត Valencia ក្នុងសមាជឆ្នាំ២០២៥ របស់គណបក្សប្រជាជនអឺរ៉ុបអភិរក្សនិយម ជាក្រុមធំបំផុតនៅក្នុងសភាអឺរ៉ុបថា «ការជជែកដេញដោលដ៏ចម្រូងចម្រាសនៅសាកលវិទ្យាល័យ(អឺរ៉ុប) ត្រូវបានស្វាគមន៍។ យើងចាត់ទុកសេរីភាពនៃវិទ្យាសាស្រ្ត និងការស្រាវជ្រាវ ជាមូលដ្ឋាន។

លោកស្រី បាននិយាយបន្តថា «មិនត្រឹម ដោយសារតែ វាជាតម្លៃស្នូលសម្រាប់យើងប៉ុណ្ណោះទេ ប៉ុន្តែក៏ដោយសារតែ នេះជារបៀបដែលភាពអស្ចារ្យនិងនវានុវត្តន៍ រីកចម្រើន»។ «នេះជាមូលហេតុ ដែលអឺរ៉ុបបើកចំហឱ្យល្អបំផុត។ នេះជាមូលហេតុ ដែលយើងនឹងធ្វើសំណើដើម្បីជួយពួកគេ «ជ្រើសរើសយកអឺរ៉ុប»។ ព្រោះយើងចង់ឱ្យអ្នកវិទ្យាសាស្ត្រ និងអ្នកស្រាវជ្រាវ មកពីគ្រប់ទិសទី ទុកអឺរ៉ុបដូចជាផ្ទះរបស់ខ្លួន»។