សេដ្ឋកិច្ចអាមេរិក ទំនងជាជាប់គាំង ឬអាចធ្លាក់ចុះ នៅក្នុងត្រីមាសទី១ ខណៈដែលអាជីវកម្មប្រញាប់ប្រញាល់បង្កើនស្តុកទុកទំនិញនាំចូលដើម្បីបញ្ចៀសការចំណាយខ្ពស់នៅពេលពន្ធមកដល់ ដោយបញ្ជាក់ពីការរំខានដ៏ធំនៃគោលនយោបាយពន្ធដ៏ច្របូកច្របល់របស់លោកប្រធានាធិបតី Donald Trump។

យ៉ាងណាក៏ដោយ របាយការណ៍ផលិតផលក្នុងស្រុកសរុប (GDP) មុនកំណត់របស់ក្រសួងពាណិជ្ជកម្ម នៅថ្ងៃពុធ (៣០ មេសា) នេះ អាចបិទបាំងទាំងស្រុងនូវការរំពឹងទុកនៃភាពស្រអាប់របស់សេដ្ឋកិច្ច ដែលកំពុងកើតមានឡើង។

ការស្ទង់មតិរបស់សារព័ត៌មានរ៉យទ័រទៅលើសេដ្ឋវិទូ បានព្យាករកំណើន GDP ត្រីមាសទី១ របស់អាមេរិក កើនក្នុងអត្រា ០,៣% ប៉ុណ្ណោះធៀបនឹងត្រីមាសមុន ហើយជំហរ GDP អវិជ្ជមានក៏ទំនងជាអាចកើតមាន បន្ទាប់ពីឱនភាពពាណិជ្ជកម្មទំនិញដ៏ខ្ពស់ក្នុងខែមីនា ដែលជំរុញឱ្យសេដ្ឋវិទូបន្ទាបការប៉ាន់ប្រមាណ GDP របស់ពួកគេ។

ទំនុកចិត្តរបស់អតិថិជនអាមេរិកគឺនៅជិតកម្រិតទាបរយៈពេល ៥ឆ្នាំ ហើយអារម្មណ៍អាជីវកម្មក៏ធ្លាក់ចុះ ខណៈក្រុមហ៊ុនអាកាសចរណ៍បានទម្លាក់ការព្យាករហិរញ្ញវត្ថុឆ្នាំ២០២៥ របស់ពួកគេ ដោយលើកឡើងពីភាពមិនប្រាកដប្រជាលើការចំណាយថ្លៃធ្វើដំណើរមិនសំខាន់ដោយសារតែពន្ធ ដែលសេដ្ឋវិទូបានព្រមានថានឹងបង្កើនការចំណាយសម្រាប់អាជីវកម្ម និងប្រជាជន៕