ជើងឯក ៦ លើកនៅកម្មវិធី Rome Masters កីឡាករស៊ែប Novak Djokovic បានសម្រេចចិត្តដកខ្លួនចេញពីការប្រកួតឆ្នាំនេះហើយ ក្នុងគោលបំណងត្រៀមលក្ខណៈសម្រាប់ព្រឹត្តិការណ៍ Grand Slam, French Open ដែលនឹងចាប់ផ្តើមនៅថ្ងៃទី ២៥ ខែឧសភា។

         Djokovic ដែលកំពុងស្វែងរកជើងឯកទី ១០០ នៅក្របខណ្ឌ ATP Tour នឹងអវត្តមានពីការប្រកួត Italian Open រឺ Rome Masters នេះជាលើកដំបូងតាំងពីបង្ហាញខ្លួនលើកទីមួយនៅឆ្នាំ ២០០៧។

         អតីតកីឡាករលេខមួយពិភពលោករូបនេះ ទើបរងបរាជ័យគួរឱ្យភ្ញាក់ផ្អើលធ្លាក់ត្រឹមជុំទីពីរ Madrid Open ក្រោយចាញ់កីឡាករអ៊ីតាលី Matteo Arnaldi។

         កីឡាករវ័យ ៣៧ ឆ្នាំរូបនេះ ក៏បានលើកឡើងក្រោយចាញ់ការប្រកួតនោះដែរថា Madrid Open ឆ្នាំនេះប្រហែលជាការចូលរួមចុងក្រោយរបស់ខ្លួន។

         ម្ចាស់ជ័យលាភី Grand Slam ២៤ លើករូបនេះ មិនទាន់ឈ្នះជើងឯកណាមួយឡើយតាំងពីឈ្នះជើងឯក ATP Finals នៅចុងឆ្នាំ ២០២៣ ជាឆ្នាំដែលរូបគេឈ្នះជើងឯក Grand Slam បីក្នុងចំណោម Grand Slam បួនប្រចាំឆ្នាំ។

         បច្ចុប្បន្នឈរលេខ ៥ ពិភពលោក Novak Djokovic កំពុងកាន់កំណត់ត្រាឈ្នះច្រើនប្រកួតបំផុតនៅក្របខណ្ឌ ATP Masters 1000 ដោយឈ្នះសរុប ៤១៤ ប្រកួត ឡើងវគ្គពាក់កណ្តាលផ្តាច់ព្រ័ត្រ ៧៩ លើក វគ្គផ្តាច់ព្រ័ត្រ ៦០ លើក ឈ្នះជើងឯក ៤០ លើក៕

អត្ថបទ៖នាង សុភាវុធ