នាយករដ្ឋមន្ត្រីលីបង់ លោក Nawaf Salam កាលពីថ្ងៃអង្គារ បានអះអាងពីការប្តេជ្ញាចិត្តរបស់ប្រទេស    លីបង់ ក្នុងការបញ្ចប់ការកាន់កាប់របស់អ៊ីស្រាអែល លើទឹកដីរបស់ប្រទេសទាំងអស់ និងបានអំពាវនាវឲ្យ មានកិច្ចខិតខំប្រឹងប្រែងការទូតកាន់តែខ្លាំង ដើម្បីបញ្ឈប់ការរំលោភដែលកំពុងបន្ត។

លោកបាននិយាយថា៖«ប្រទេសលីបង់ស្វែងរកការបញ្ចប់ការរំលោភបំពានទាំងនេះ និងទាមទារយកមកវិញនូវទឹកដីរបស់ខ្លួនទាំងស្រុង»។ នេះបើយោងតាមទីភ្នាក់ងារសារព័ត៌មានជាតិផ្លូវការ។ 

លោក Salam បានថ្កោលទោសការវាយប្រហារនាពេលថ្មីៗនេះលើតំបន់ជាយក្រុងភាគខាងត្បូងនៃទីក្រុង បេរូត និងការឈ្លានពានរបស់អ៊ីស្រាអែលផ្សេងទៀត ដោយពណ៌នាពួកវាថា ជា «ការរំលោភលើកិច្ចព្រមព្រៀងបញ្ចប់អរិភាព»។ លោកបានសង្កត់ធ្ងន់លើភាពបន្ទាន់នៃ«ការធ្វើឲ្យដំណើរការនូវយន្តការត្រួតពិនិត្យ ដើម្បីបញ្ឈប់ការរំលោភទាំងនេះ»។

នៅក្នុងជំនួបជាមួយគណៈប្រតិភូមកពីសារព័ត៌មាន Press Syndicate លោកនាយករដ្ឋមន្ត្រី បានបញ្ជាក់ ជាថ្មីនូវការប្តេជ្ញាចិត្តរបស់ប្រទេសលីបង់ ចំពោះកិច្ចព្រមព្រៀងដែលមានស្រាប់ ហើយបានអំពាវនាវឲ្យអ៊ីស្រាអែលធ្វើដូចគ្នា។

លោក Salam បានថ្លែងថា ប្រទេសលីបង់ កំពុងចូលរួមយ៉ាងសកម្មជាមួយតួអង្គអន្តរជាតិដ៏មានឥទ្ធិពល ដើម្បីអនុវត្តសម្ពាធការទូត។ លោកបាននិយាយថា៖«យើងកំពុងបន្តទំនាក់ទំនងជាមួយជនជាតិ    អាមេរិក បារាំង និងបណ្តាប្រទេសអារ៉ាប់ និងអឺរ៉ុបសំខាន់ៗផ្សេងទៀត ដើម្បីជំរុញកិច្ចខិតខំប្រឹងប្រែងទាំងនេះ»។