ប្រជាពលរដ្ឋរស់នៅតំបន់ភាគកណ្តាលឈៀងខាងលិចប្រទេសប៉េរូ នាំគ្នាបោសសម្អាតកម្ទេចកម្ទី និងគំនរភក់បណ្តាលមកពីបំណាក់ដីដែលបានឆក់យកអាយុជីវិតមនុស្ស ២នាក់ និងធ្វើឲ្យប៉ះពាល់ដល់មនុស្សរាប់រយនាក់ផ្សេងទៀត ។

យោងតាមសេចក្តីរាយការណ៍របស់សារព័ត៌មានប៉េរូ បានឲ្យដឹងថា បំណាក់ដីបានកើតមានកាលពីព្រឹកថ្ងៃចន្ទ បង្ខំឲ្យប្រជាពលរដ្ឋរត់គេចចេញពីផ្ទះសម្បែងរបស់ពួកគេ ។ មនុស្ស ៨នាក់ បានរងរបួស និងមនុស្សរាប់រយនាក់ផ្សេងទៀត រងផលប៉ះពាល់ ។

វិទ្យាស្ថានជាតិស្រាវជ្រាវប្រព័ន្ធអេកូឡូស៊ីផ្ទាំងទឹកកក និងភ្នំ(INAIGEM) បញ្ជាក់នៅក្នុងសារបង្ហោះលើបណ្តាញព័ត៌មានសង្គម Facebookថា ជាផ្នែកមួយនៃការអង្កេតបច្ចេកទេស ពួកយើងសូមបញ្ជាក់ថា វាគឺជាហូររបស់បឹកទឹកកកនៅជើងភ្នំ Vallunaraju នៅកន្លែងតែមួយដែលមានការហូរដូចគ្នាកាលពីថ្ងៃទី ២៦ ខែមីនា ។

ក្រុមមន្រ្តី INAIGEM និយាយនៅក្នុងសន្និសីទសារព័ត៌មានថា មាននូវបឹងទឹកកកចំនួន ១៦០កន្លែងប្រឈមហានិភ័យនៃការហូរបង្កជាបំណាក់ដី នៅតំបន់ Ancash ៕