នៅឯសវនាការរបស់តុលាការពិភពលោក ក្នុងទីក្រុងឡាអេ ប្រទេសហូឡង់ នាថ្ងៃពុធ (ទី៣០ ខែមេសា) សហរដ្ឋអាមេរិក បានលើកឡើងថា អ៊ីស្រាអែលមិនអាចត្រូវបានបង្ខំឲ្យយល់ព្រមអនុញ្ញាតឲ្យទីភ្នាក់ងារជនភៀសខ្លួនប៉ាឡេស្ទីន UNRWA របស់អង្គការសហប្រជាជាតិ (UN) ធ្វើប្រតិបត្តិការ នៅតំបន់ហ្កាហ្សានោះឡើយ។

គួររំលឹកថា អ៊ីស្រាអែលកាលពីឆ្នាំមុនបានអនុម័តច្បាប់ដែលហាមឃាត់ UNRWA មិនឲ្យមានប្រតិបត្តិការ នៅក្នុងប្រទេស ខណៈដែលខ្លួនបានប្រាប់ថា អង្គការនេះបានជួលសមាជិករបស់ក្រុមហាម៉ាសដែលបានចូលរួមក្នុងការវាយប្រហារលើអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣។

បើយោងតាមអ៊ីស្រាអែល បានឲ្យដឹងថា UN បាននិយាយកាលពីខែសីហាថា បុគ្គលិករបស់ UNRWA ៩នាក់ ប្រហែលជាជាប់ពាក់ព័ន្ធក្នុងការវាយប្រហារ នាពេលនោះ ហើយត្រូវបានបណ្តេញចេញ។ មេបញ្ជាការក្រុមហាម៉ាសម្នាក់ទៀតដែលត្រូវបានបញ្ជាក់ដោយ UNRWA ថា ជាបុគ្គលិករបស់ខ្លួនដែរនោះ ត្រូវបានសម្លាប់ក្នុងខែតុលា នៅតំបន់ហ្កាហ្សា។

មហាសន្និបាត UN កាលពីខែធ្នូ បានស្នើឲ្យតុលាការកំពូលរបស់ UN ចេញសេចក្ដីសម្រេចដោយគ្មានចំណងផ្លូវច្បាប់ ជុំវិញកាតព្វកិច្ចរបស់អ៊ីស្រាអែល ក្នុងការជួយសម្របសម្រួលដល់ជំនួយ សម្រាប់ជនជាតិប៉ាឡេស្ទីន ដែលផ្តល់ដោយរដ្ឋ និងអង្គការអន្តរជាតិនានា ក្នុងនោះរួមទាំងអង្គការសហប្រជាជាតិផងដែរ។

តែនៅថ្ងៃទី៣ នៃសវនាការលើបញ្ហានេះ សហរដ្ឋអាមេរិកបានបញ្ជាក់ថា អ៊ីស្រាអែលមានសិទ្ធិក្នុងការកំណត់ថា អង្គការណាខ្លះអាចផ្តល់តម្រូវការមូលដ្ឋានដល់ប្រជាជននៃដែនដីកាន់កាប់ប៉ាឡេស្ទីនមួយនេះ។

តំណាង UN និងប៉ាឡេស្ទីន អំឡុងដើមដំបូងនៃសវនាការ កាលពីថ្ងៃចន្ទ បានចោទប្រកាន់អ៊ីស្រាអែលពីបទបំពានច្បាប់អន្តរជាតិ ដោយសារបដិសេធមិនអនុញ្ញាតឲ្យមានជំនួយចូលទៅក្នុងតំបន់ហ្កាហ្សា៕