សហភាពអឺរ៉ុបនឹងស្វែងកាលានុវត្តភាពថ្មីជំរុញវិស័យជលផលនៅក្នុងប្រទេសកម្ពុជា ខណៈគម្រោងជំរុញកំណើនវិស័យជលផលប្រកបដោយចីរភាព និងបរិយាបន្ន (CAPFISH-Capture) ដែលផ្តល់មូលនិធិដោយកិច្ចសហប្រតិបត្តិការអភិវឌ្ឍន៍សហភាពអឺរ៉ុប នឹងត្រូវបិទបញ្ចប់នៅចុងឆ្នាំ២០២៥។

មានប្រសាសន៍ប្រាប់អ្នកសារព័ត៌មានក្នុងពេលអញ្ជើញទស្សនកិច្ចនៅតំបន់សហគមន៍នេសាទស្រីចឹក ស្ថិតនៅស្រុកកណ្តៀង ខេត្តពោធិ៍សាត់ នារសៀលថ្ងៃទី៣០ខែមេសា ឆ្នាំ២០២៥ លោក ឃូន អេវើរេត( Koen Everaert ) អនុប្រធានសហប្រតិបត្តិការ នៃសហភាពអឺរុប ប្រចាំប្រទេសកម្ពុជា បានមានប្រសាសន៍ថា តាមការគ្រោងទុកគម្រោង CAPFISH-Capture នឹងបញ្ចប់នៅចុងឆ្នាំ២០២៥ ប៉ុន្តែសហភាពអឺរ៉ុបនៅតែមានចក្ខុវិស័យវែងឆ្ងាយអាចនឹងជជែកជាមួយរាជរដ្ឋាភិបាលកម្ពុជា និងដៃគូពាក់ព័ន្ធ ក្នុងការស្វែងរកកាលានុវត្តភាពថ្មីៗជំរុញវិស័យជលផលនៅក្នុងប្រទេសកម្ពុជា។

បច្ចុប្បន្ននេះ រដ្ឋបាលជលផល (FiA) នៃក្រសួងកសិកម្ម រុក្ខាប្រមាញ់ និងនេសាទ (MAFF) បាននិងកំពុងអនុវត្ត«កម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន (CAPFISH-Capture)» ដែលផ្តល់មូលនិធិដោយកិច្ចសហប្រតិបត្តិការអភិវឌ្ឍន៍សហភាពអឺរ៉ុប ក្នុងទំហំថវិការ៣៥លានដុល្លាសហរដ្ឋអាមេរិក។គោលបំណងនៃកម្មវិធីនេះ គឺដើម្បីលើកកម្ពស់កំណើនប្រកបដោយនិរន្តរភាព ភាពធន់នឹងអាកាសធាតុ និងបរិយាបន្ននៅក្នុងវិស័យជលផលទឹកសាប និងសមុទ្ររបស់ប្រទេសកម្ពុជា៕ អត្ថបទ៖ ទូច សោភ័ណ