ប្រទេសអូស្ត្រាលី បានបញ្ជូននាវាចម្បាំងមួយគ្រឿងទៅកៀកនឹងមាត់ទ្វារផ្ទះរបស់ចិន ក្នុងសមុទ្រចិនខាងត្បូងដែលមានជម្លោះ បន្ទាប់ពីទីក្រុងប៉េកាំង បានធ្វើប្រតិបត្តិការនាវាចរណ៍មិនធ្លាប់មានពីមុនមកនៅតំបន់ដែនទឹកក្បែរសម្ព័ន្ធមិត្តរបស់សហរដ្ឋអាមេរិកមួយនេះ ក្នុងមហាសមុទ្រប៉ាស៊ីហ្វិកខាងត្បូង។

ទីក្រុងកង់បេរ៉ា បាននិយាយថា អូស្ត្រាលីមាន "ប្រវត្តិដ៏យូរលង់" នៃប្រតិបត្តិការនៅក្នុងសមុទ្រចិនខាងត្បូង ជាទីដែលការអះអាងសិទ្ធិរបស់ចិន ត្រួតជាន់គ្នាជាមួយប្រទេសជិតខាងមួយចំនួន រួមទាំងហ្វីលីពីនផងដែរ។ យោធាចិន បានឆ្លើយតបដោយប្តេជ្ញាការពារយ៉ាងម៉ឺងម៉ាត់នូវអធិបតេយ្យភាព និងសិទ្ធិដែនសមុទ្ររបស់ខ្លួនក្នុងសមុទ្រចិនខាងត្បូង ខណៈពេលដែលរក្សាសន្តិភាព និងស្ថិរភាពក្នុងតំបន់។

ក្រសួងការពារជាតិអូស្ត្រាលីនិយាយថា នាវាចម្បាំង HMAS Sydney ដែលជានាវាពិឃាតសង្គ្រាមផ្លូវអាកាសថ្នាក់ Hobart មួយក្នុងចំណោម ៣គ្រឿង ដែលបម្រើការជាមួយកងទ័ពជើងទឹកអូស្ត្រាលី ត្រូវបានដាក់ពង្រាយនៅថ្ងៃទី០៣ ខែមេសា សម្រាប់បេសកកម្ម ៣ខែនៅក្នុងតំបន់ឥណ្ឌូប៉ាស៊ីហ្វិក។

ខណៈនាវាចម្បាំង Sydney នោះកំពុងឆ្លងកាត់ដែនទឹកហ្វីលីពីន នៅសមុទ្រចិនខាងត្បូង យោធាចិនបាននិយាយថា បញ្ជាការភាគខាងត្បូងនៃកងទ័ពរំដោះប្រជាជនចិន របស់ខ្លួនបាន "ល្បាតតាមទម្លាប់" នៅទីតាំងដែលមិនបានបង្ហាញ នៅក្នុងដែនទឹកជម្លោះនេះ៕