មនុស្សម្នាជាច្រើន រួមទាំងគ្រូបង្រៀន និងសិស្ស បានបង្កការបំផ្លិចបំផ្លាញលើទីតាំងជាច្រើនតាមដងផ្លូវនៅរដ្ឋ Guerrero ភាគនិរតីប្រទេសម៉ិកស៊ិក កាលពីថ្ងៃពុធ (៣០ មេសា) ដើម្បីតវ៉ាប្រឆាំងនឹងការសម្លាប់សកម្មជនបរិស្ថានម្នាក់ឈ្មោះ Marco Antonio Suastegui ខណៈអំពើហិង្សាកាន់តែអាក្រក់។

លោក Suastegui ដែលល្បីល្បាញដោយសារការប្រឆាំងនឹងគម្រោងទំនប់វារីអគ្គិសនី La Parota ក្នុងរដ្ឋ Guerrero ត្រូវបានគេបាញ់ និងរងរបួសធ្ងន់កាលពីថ្ងៃទី១៨ ខែមេសា ក្នុងក្រុង Acapulco ហើយក្រោយមក បានស្លាប់ដោយសាររបួសក្នុងមន្ទីរពេទ្យកាលពីថ្ងៃសុក្រ (២៥ មេសា)។

សហគមន៍មូលដ្ឋានបានតវ៉ាថា គម្រោងសាងសង់ទំនប់វារីអគ្គិសនី ដែលលោក Suastegui ប្រឆាំង ធ្វើឱ្យប៉ះពាល់ដល់បរិស្ថាន និងសង្គម ហើយការស្លាប់របស់សកម្មជនរូបនោះជារឿងមិនគួរកើតឡើង។ ក្រុមបាតុករប្រើបង្គោលដែក និងគ្រឿងផ្ទុះទៅវាយប្រហារបញ្ជរបង់ប្រាក់នៅក្រៅក្រុង Chilpancingo ដែលអនុញ្ញាតឱ្យរថយន្តឆ្លងកាត់ និងចែកខិតប័ណ្ណរៀបរាប់លម្អិតពីឃាតកម្មដល់អ្នកបើកបរ។

សិស្សមកពីសាលា Ayotzinapa Normal Rural School ដែលទទួលបានការចាប់អារម្មណ៍ទូទាំងប្រទេសបន្ទាប់ពីសិស្សរបស់ខ្លួនចំនួន ៤៣នាក់ត្រូវបានចាប់ និងបាត់ខ្លួនក្នុងឆ្នាំ២០១៤ គឺជាអ្នកនៅពីក្រោយបាតុកម្មដ៏ហិង្សានេះ៕