រដ្ឋមន្ត្រីការពារជាតិអាមេរិក លោក Pete Hegseth បានព្រមានអ៊ីរ៉ង់ កាលពីថ្ងៃពុធ (៣០ មេសា) ថា ខ្លួននឹងប្រឈមមុខនឹងផលវិបាកយ៉ាងធ្ងន់ធ្ងរសម្រាប់ការគាំទ្រក្រុមសកម្មប្រយុទ្ធហ៊ួទី បើទោះបីជាសហរដ្ឋអាមេរិក បានបើកកិច្ចចរចាឡើងវិញជាមួយអ៊ីរ៉ង់ ជុំវិញកម្មវិធីនុយក្លេអ៊ែររបស់ខ្លួនក៏ដោយ។

លោក Hegseth បានសរសេរបង្ហោះលើបណ្ដាញសង្គម X ថា "សារទៅកាន់អ៊ីរ៉ង់៖ អាមេរិកមើលឃើញការគាំទ្រដ៏គ្រោះថ្នាក់របស់ប្រទេសនេះពោះក្រុមហ៊ួទី ហើយក៏ដឹងច្បាស់ពីអ្វីដែលអ៊ីរ៉ង់កំពុងធ្វើ"។ ប្រធានមន្ទីរបញ្ចកោណរូបនេះបន្ថែមថា "ទីក្រុងតេអេរ៉ង់ គួរតែដឹងយ៉ាងច្បាស់ពីសមត្ថភាពរបស់យោធាអាមេរិក" ដោយព្រមានថា អ៊ីរ៉ង់នឹងបង់ខាតធ្ងន់ធ្ងរលើរឿងនេះ។

ក្រោយមកលើគណនី X ផ្ទាល់ខ្លួន លោក Hegseth បានបង្ហោះឡើងវិញនូវសាររបស់លោកប្រធានាធិបតី Donald Trump នៅលើបណ្ដាញសង្គម Truth Social កាលពីខែមីនា ដែលនិយាយថា លោកនឹងឱ្យអ៊ីរ៉ង់ទទួលខុសត្រូវ ចំពោះការវាយប្រហារណាមួយដែលធ្វើឡើងដោយក្រុមហ៊ួទី។ មេដឹកនាំអ៊ីរ៉ង់ធ្លាប់បាននិយាយរួចមកហើយថា ក្រុមប្រដាប់អាវុធហ៊ួទី នៅប្រទេសយេម៉ែន ធ្វើសកម្មភាពណាមួយដោយឯករាជ្យប៉ុណ្ណោះ៕