អតីតអនុប្រធានាធិបតីសហរដ្ឋអាមេរិក លោកស្រី Kamala Harris បានអំពាវនាវកាលពីថ្ងៃពុធ (៣០ មេសា) ឱ្យប្រជាជនអាមេរិក ក្រោកឈរឡើងរួមគ្នាប្រឆាំងនឹងលោកប្រធានាធិបតី Donald Trump និងអ្វីដែលលោកស្រីហៅថា "វិបត្តិសេដ្ឋកិច្ចដ៏ធំបំផុតដែលបង្កើតឡើងដោយមនុស្ស នៅក្នុងប្រវត្តិសាស្ត្រប្រធានាធិបតីសម័យទំនើប"។

លោកស្រី Harris បានលើកឡើងបែបនេះនៅក្នុងសុន្ទរកថាដ៏ធំបំផុតរបស់ខ្លួន ចាប់តាំងពីការចាកចេញពីតំណែង ហើយក៏ជាការងើបទៅកាន់ឆាកនយោបាយឡើងវិញ សម្រាប់បេក្ខជនប្រធានាធិបតីនៃបក្សប្រជាធិបតេយ្យរូបនេះ ចាប់តាំងពីលោកស្រីបានចាញ់ឆ្នោតទល់នឹងលោក Trump កាលពីឆ្នាំមុនមក។

ថ្លែងក្នុងថ្ងៃកាន់តំណែងទី១០០ របស់លោក Trump លោកស្រី Harris បាននិយាយថា ពន្ធដែលជាចំណុចសំខាន់នៃគោលនយោបាយសេដ្ឋកិច្ចរបស់លោក Trump គឺ "ច្បាស់ណាស់ថាកំពុងនាំមកនូវវិបត្តិសេដ្ឋកិច្ច"។ លោកស្រីបន្តថា នយោបាយលោក Trump ផ្តល់ប្រយោជន៍ដល់អ្នកមាន ហើយពិពណ៌នាពី "ចក្ខុវិស័យដ៏តូចចង្អៀត និងបម្រើឱ្យខ្លួនឯង" របស់លោក ដែល "ដាក់ទណ្ឌកម្មដល់អ្នកនិយាយការពិត លើកតម្កើងបក្សពួកស្មោះត្រង់នឹងខ្លួន ប្រើប្រាក់កាន់អំណាច និងមិនអើពើអ្នកដទៃ"។

លើសពីនេះ លោកស្រី Harris ចេញមកប្រឆាំងដោយចំហ ដោយជំរុញឱ្យសម្ព័ន្ធមិត្តរបស់លោកស្រីបញ្ចេញសំឡេងរបស់ពួកគេឱ្យខ្លាំងៗ។ លោកស្រីបានព្រមានពីវិបត្តិរដ្ឋធម្មនុញ្ញដែលកំពុងកើតឡើង ប្រសិនបើសភា ឬតុលាការ "មិនធ្វើតាមផ្នែករបស់ពួកគេ" ហើយក៏បានលើកទឹកចិត្តជនជាតិអាមេរិកឱ្យធ្វើការជាមួយគ្នាតតាំងនឹងវិបត្តិ៕