រដ្ឋមន្ត្រីការបរទេសឥណ្ឌា បាននិយាយនៅថ្ងៃព្រហស្បតិ៍នេះថា អ្នកដែលមានផែនការ និងបានវាយប្រហារនៅតំបន់កាស្មៀរកាលពីសប្តាហ៍មុន ដែលបានបណ្តាលឲ្យមនុស្ស ២៦នាក់ស្លាប់ ត្រូវតែនាំយកមកកាត់ទោស។

ទីក្រុងញូវដែលី បានបន្ទោសប៉ាគីស្ថានចំពោះការវាយប្រហារដោយកាំភ្លើងលើជនស៊ីវិល នៅឯតំបន់ទេសចរណ៍ Pahalgam ក្នុងតំបន់កាស្មៀរ(Kashmir) ដែលគ្រប់គ្រងដោយឥណ្ឌា កាលពីថ្ងៃទី ២២ ខែមេសា។

ទីក្រុងអ៊ីស្លាម៉ាបាដ បានច្រានចោលការចោទប្រកាន់នេះ ហើយប្រទេសទាំងពីរ ចាប់តាំងពីពេលនោះមកបានបាញ់ប្រហារតគ្នា នៅតំបន់កាស្មៀរ និងបានចេញនូវវិធានការការទូតដាក់ទណ្ឌកម្មទៅវិញទៅមក។  

ប្រមុខការទូតឥណ្ឌា លោក Subrahmanyam Jaishankar បាននិយាយនៅក្នុងសេចក្តីថ្លែងការណ៍មួយបន្ទាប់ពីការសន្ទនាជាមួយរដ្ឋមន្ត្រីការបរទេសអាមេរិកលោក Marco Rubio កាលពីល្ងាចថ្ងៃពុធថា៖«ជនល្មើស អ្នកគាំទ្រ និងអ្នករៀបចំផែនការ ត្រូវតែត្រូវបាននាំមកកាត់ទោស»។

លោក Rubio ក៏បាននិយាយទៅកាន់នាយករដ្ឋមន្ត្រីប៉ាគីស្ថានលោក Shehbaz Sharif ហើយនៅក្នុងសេចក្តីថ្លែងការណ៍ សហរដ្ឋអាមេរិក បានប្រាប់លោក Sharif អំពី«ចាំបាច់ត្រូវថ្កោលទោសការវាយប្រហារភេរវកម្ម» នៅក្នុងតំបន់កាស្មៀរ។

កងទ័ពឥណ្ឌា បាននិយាយថា ទាហានឥណ្ឌា និងប៉ាគីស្ថាន បានបាញ់គ្នាទៅវិញទៅមកពេញមួយយប់នៅតាមបណ្តោយខ្សែបន្ទាត់នៃការគ្រប់គ្រង ដែលជាព្រំដែនពិតប្រាកដ នៅក្នុងតំបន់កាស្មៀរ ដែលមានជម្លោះនេះ។