អតីតប្រធានាធិបតីកូរ៉េខាងត្បូង លោក Yoon Suk Yeol នៅថ្ងៃព្រហស្បតិ៍ (ទី១ ខែឧសភា) នេះ ត្រូវបានចោទប្រកាន់ជាផ្លូវការ ដោយមិនមានការឃុំខ្លួន ពីបទរំលោភអំណាច ជុំវិញការប្រកាសច្បាប់អាជ្ញាសឹក ដោយបន្ថែមហានិភ័យដល់ដំណើរការផ្លូវច្បាប់របស់អតីតមេដឹកនាំដែលត្រូវបានចោទប្រកាន់ទម្លាក់តំណែង។

ការចោទប្រកាន់ថ្មីនេះកើតឡើងនៅពេលដែលលោក Yoon កំពុងត្រូវបានកាត់ក្ដី ពីបទបង្កើតការបះបោរជាមួយនឹងការប៉ុនប៉ងរបស់លោក ក្នុងការដាក់ចេញច្បាប់អាជ្ញាសឹក កាលពីថ្ងៃទី៣ ខែធ្នូ ដែលបានស្វែងរកការបញ្ឈប់ការគ្រប់គ្រងស៊ីវិល នៅក្នុងប្រទេសកូរ៉េខាងត្បូងដែលប្រកាន់លទ្ធិប្រជាធិបតេយ្យ។

ទាហានប្រដាប់ដោយអាវុធត្រូវបានដាក់ពង្រាយទៅកាន់រដ្ឋសភា ក្រោមក្រឹត្យនោះ ប៉ុន្តែបទបញ្ជានេះមានរយៈពេលប្រហែល ៦ម៉ោងប៉ុណ្ណោះ ខណៈដែលត្រូវបានបោះឆ្នោតបដិសេធយ៉ាងរហ័ស ដោយសមាជិកសភាគណបក្សប្រឆាំង។ ក្រោយមកពួកគេបានចោទប្រកាន់ទម្លាក់តំណែងលោក Yoon ជុំវិញការប្រកាសច្បាប់អាជ្ញាសឹកនោះ។

លោក Yoon ដែលមានវ័យ ៦៤ឆ្នាំ ត្រូវបានបញ្ចប់តំណែងមេដឹកនាំប្រទេស និងដកហូតអភ័យឯកសិទ្ធិ នៅក្នុងខែមេសា ដោយតុលាការធម្មនុញ្ញ ដែលបានតម្កល់ការចោទប្រកាន់ទម្លាក់តំណែង។ មិនយូរប៉ុន្មាន រូបលោកត្រូវបានបង្ខំឲ្យចាកចេញពីនិវេសនដ្ឋានប្រធានាធិបតី។

រដ្ឋអាជ្ញាបានចោទប្រកាន់លោក Yoon ផ្លូវការលើកដំបូង ក្នុងខែមករា នៅពេលដែលលោកនៅតែស្ថិតក្នុងតំណែងប្រធានាធិបតីថា ជា «មេដឹកនាំបះបោរ» ជាការចោទប្រកាន់ដែលមិនត្រូវបានការពារដោយអភ័យឯកសិទ្ធិប្រធានាធិបតីនោះឡើយ។ រដ្ឋអាជ្ញាបានឲ្យដឹងនៅក្នុងសេចក្តីថ្លែងការណ៍នាថ្ងៃទី១ ខែឧសភានេះថា៖ «ចាប់តាំងពីពេលនោះមក យើងបានបន្តការកាត់ក្តី (ការបះបោរ) ខណៈពេលដែលកំពុងដំណើរការស៊ើបអង្កេតបន្ថែមលើការចោទប្រកាន់ពីបទរំលោភអំណាច ទើបនាំមានការចោទប្រកាន់ផ្លូវការបន្ថែមនេះ»។

ប្រសិនបើត្រូវបានកាត់ទោសពីបទបះបោរនោះ លោក Yoon អាចនឹងត្រូវកាត់ទោសឲ្យជាប់ពន្ធនាគារអស់មួយជីវិត ឬប្រហារជីវិត តែកូរ៉េខាងត្បូងបានផ្អាកមិនផ្លូវការនូវការអនុវត្តទោសប្រហារជីវិត ចាប់តាំងពីឆ្នាំ១៩៩៧៕