អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា យ៉ាងហោចណាស់ជនស៊ីវិល ៥៤២ នាក់ ត្រូវបានបញ្ជាក់ថា ត្រូវបានសម្លាប់ នៅក្នុងតំបន់ North Darfur ខាងជើងនៃប្រទេសស៊ូដង់ ក្នុងរយៈពេល បី  សប្តាហ៍ កន្លងទៅនេះ ដោយព្រមានថា ចំនួនអ្នកស្លាប់ពិតប្រាកដ ទំនងជា«ខ្ពស់ជាងនេះ»។

ប្រធានសិទ្ធិមនុស្សអង្គការសហប្រជាជាតិ លោក Volker Turk បាននិយាយនៅក្នុងសេចក្តីថ្លែងការណ៍មួយ ដោយសំដៅទៅលើសង្រ្គាមស៊ីវិល ដែលកំពុងបន្តរបស់ប្រទេសនេះថា៖«ភាពភ័យរន្ធត់ដែលកើតឡើង នៅក្នុងប្រទេសស៊ូដង់ គ្មានព្រំដែនទេ»។

ជាពិសេស តំបន់ Darfur បានក្លាយជាសមរភូមិដ៏សំខាន់ នៅក្នុងសង្រ្គាមដែលបានផ្ទុះឡើង នៅថ្ងៃទី ១៥ ខែមេសា ឆ្នាំ ២០២៣ រវាងកងទ័ពធម្មតាដែលដឹកនាំដោយ លោក Abdel Fattah Al-Burhan និងកងកម្លាំងគាំទ្ររហ័ស (RSF) ដែលដឹកនាំដោយអតីតអនុរបស់ខ្លួន គឺ លោក Mohamed Hamdan Dagalo ។

សង្រ្គាមនេះ បានបណ្តាលឲ្យមនុស្សរាប់ម៉ឺននាក់ ស្លាប់ និងបង្កឲ្យមានអ្វីដែលភ្នាក់ងារជំនួយពណ៌នាថា ជាការផ្លាស់ទីលំនៅ និងវិបត្តិស្រេកឃ្លានដ៏ធំបំផុតរបស់ពិភពលោក។

ការប្រយុទ្ធគ្នាដើម្បីដណ្តើមកាន់កាប់ទីក្រុង El-Fasher ដែលជាទីក្រុងសំខាន់ចុងក្រោយ នៅតំបន់ Darfur ពីការគ្រប់គ្រងរបស់កងកម្លាំងគាំទ្ររហ័ស (RSF) បានកើនឡើងកាន់តែខ្លាំង ក្នុងប៉ុន្មានសប្តាហ៍ថ្មីៗនេះ ខណៈដែលទាហាន បានស្វែងរកសំណងសម្រាប់ការបាត់បង់រដ្ឋធានី Khartoum របស់ពួកគេ កាលពីខែមុន។