រដ្ឋមន្ត្រីក្រសួងរតនាគារលោក Scott Bessent នៅថ្ងៃព្រហស្បតិ៍ (ទី១ ខែឧសភា) នេះ បាននិយាយថា កិច្ចព្រមព្រៀងរ៉ែ រវាងសហរដ្ឋអាមេរិក និងអ៊ុយក្រែន គឺជាភាពជាដៃគូសេដ្ឋកិច្ចពេញលេញ ដែលនឹងអាចឲ្យលោកប្រធានាធិបតី Donald Trump ចរចាជាមួយរុស្ស៊ីដោយផ្អែកលើមូលដ្ឋានកាន់តែរឹងមាំជាងមុន។

គួរបញ្ជាក់ថា កិច្ចព្រមព្រៀងដែលត្រូវបានចុះហត្ថលេខាកាលពីថ្ងៃពុធ (ទី៣០ ខែមេសា) នឹងផ្តល់ឲ្យសហរដ្ឋអាមេរិកនូវលក្ខខណ្ឌអំណោយផល ក្នុងការមានលទ្ធភាពទទួលបានកិច្ចព្រមព្រៀងរ៉ែថ្មីរបស់អ៊ុយក្រែន និងការវិនិយោគទុន នៅក្នុងការកសាងប្រទេសឡើងវិញរបស់អ៊ុយក្រែន។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Fox Business Network លោក Bessent បានប្រាប់ថា កិច្ចព្រមព្រៀងនេះ នឹងបង្ហាញ «ថ្នាក់ដឹកនាំរបស់រុស្ស៊ីថា មិនមានការឈ្លោះប្រកែកគ្នានោះឡើយ រវាងប្រជាជនអ៊ុយក្រែន និងប្រជាជនអាមេរិក ក៏ដូចជារវាងគោលដៅរបស់ពួកយើងផងដែរ»។

លោកបានបញ្ជាក់ថា៖ «ប្រជាជនអាមេរិកនឹងមិនរកលុយចំណេញឡើយ ប្រសិនបើអ៊ុយក្រែនមិនរីកចម្រើន។ ដូច្នេះ ឥឡូវនេះ ពួកយើងបានឈរនៅក្នុងឈរជាមួយគ្នាផ្នែកសេដ្ឋកិច្ច។ ហើយម្តងទៀត ខ្ញុំគិតថា នេះគឺជាសញ្ញាដ៏រឹងមាំមួយ ក្នុងការផ្ញើសារទៅកាន់ថ្នាក់ដឹកនាំរុស្ស៊ី ហើយវាផ្តល់ឲ្យលោកប្រធានាធិបតី Trump នូវលទ្ធភាព ក្នុងការចរចាជាមួយរុស្ស៊ីនៅលើមូលដ្ឋានកាន់តែរឹងមាំជាងមាំ»។

លោក Bessent បានសង្កត់ធ្ងន់ថា៖ «នេះគឺជាភាពជាដៃគូសេដ្ឋកិច្ចពេញលេញ។ នេះមិនមែនគ្រាន់តែជាកិច្ចព្រមព្រៀងរ៉ែកម្រប៉ុណ្ណោះទេ វាជាកិច្ចព្រមព្រៀងហេដ្ឋារចនាសម្ព័ន្ធ វាជាកិច្ចព្រមព្រៀងថាមពល។ ដូច្នេះ ឱកាសមាននៅទីនេះ ដើម្បីឲ្យភាគីទាំង២ មាននូវជ័យជម្នះយ៉ាងពិតប្រាកដ»។

សូមបញ្ជាក់បន្ថែមថា កិច្ចព្រមព្រៀងនេះបង្កើតមូលនិធិវិនិយោគរួម សម្រាប់ការកសាងប្រទេសឡើងវិញរបស់អ៊ុយក្រែន ខណៈដែលលោក Trump ព្យាយាមធានាឲ្យមានដំណោះស្រាយសន្តិភាព នៅក្នុងសង្គ្រាមរយៈពេល ៣ឆ្នាំរបស់រុស្ស៊ី នៅអ៊ុយក្រែន៕