ទីក្រុង Kyiv និងទីក្រុងវ៉ាស៊ីនតោន កាលពីថ្ងៃព្រហស្បតិ៍ ១ ឧសភា បានសាទរចំពោះកិច្ចព្រមព្រៀងដែលផ្តល់ឱ្យសហរដ្ឋអាមេរិកនូវការទទួលបានសិទ្ធិការជីកយករ៉ែថ្មីរបស់អ៊ុយក្រែន ជាព្រឹត្តិការណ៍ដ៏សំខាន់មួយ ដែលមន្ត្រីជាន់ខ្ពស់អាមេរិកមួយរូប បាននិយាយថានឹងពង្រឹងជំហរចរចារបស់ប្រធានាធិបតី Donald Trump ជាមួយរុស្ស៊ី។  

វិមានក្រឹមឡាំងបានស្ងាត់ស្ងៀមចំពោះកិច្ចព្រមព្រៀងកាលពីថ្ងៃពុធសប្ដាហ៍នេះ ប៉ុន្តែអតីតប្រធានាធិបតីរុស្ស៊ីលោក Dmitry Medvedev បាននិយាយថា នោះមានន័យថាលោក Trump បាន "បំបែករបបក្រុងKyiv" ដោយសារតែអ៊ុយក្រែននឹងត្រូវចំណាយសម្រាប់ជំនួយយោធាអាមេរិកជាមួយនឹងធនធានរ៉ែ។  

កិច្ចព្រមព្រៀងដែលត្រូវបានចុះហត្ថលេខានៅទីក្រុងវ៉ាស៊ីនតោន និងជំរុញយ៉ាងខ្លាំងដោយលោក Trumpនឹងបង្កើតមូលនិធិវិនិយោគរួមសម្រាប់ការកសាងឡើងវិញរបស់អ៊ុយក្រែនខណៈប្រធានាធិបតីអាមេរិកព្យាយាមធានាឱ្យមានដំណោះស្រាយសន្តិភាពក្នុងសង្គ្រាមបីឆ្នាំរបស់រុស្ស៊ីនៅអ៊ុយក្រែន។ 

កិច្ចព្រមព្រៀងនេះផ្តល់សិទ្ធិដល់សហរដ្ឋអាមេរិកចំពោះគម្រោងរ៉ែថ្មីរបស់អ៊ុយក្រែន។ កិច្ចព្រមព្រៀងនេះ ជាចំណុចកណ្តាលនៃកិច្ចខិតខំប្រឹងប្រែងរបស់អ៊ុយក្រែនក្នុងការប៉ះពៅទំនាក់ទំនងជាមួយសេតវិមាន ដែលបានបែកបាក់បន្ទាប់ពីលោក Trump ចូលកាន់តំណែងក្នុងខែមករា។

រដ្ឋមន្ត្រីក្រសួងរតនាគារសហរដ្ឋអាមេរិកលោក Scott Bessent បានប្រាប់សារព័ត៌មាន Fox Business ក្នុងបទសម្ភាសន៍មួយថា កិច្ចព្រមព្រៀងនេះ នឹងបង្ហាញដល់មេដឹកនាំរបស់រុស្ស៊ីថា គ្មានការរារាំងរវាងប្រជាជនអ៊ុយក្រែន និងប្រជាជនអាមេរិក ក៏ដូចជារវាងគោលដៅរបស់ប្រទេសទាំងពីរឡើយ។ លោកបាននិយាយថា ជាថ្មីម្តងទៀត លោកគិតថានេះគឺជាសញ្ញាដ៏រឹងមាំមួយចំពោះថ្នាក់ដឹកនាំរុស្ស៊ី ហើយក៏នឹងផ្តល់ឱ្យលោកប្រធានាធិបតី Trump នូវលទ្ធភាពក្នុងការចរចាជាមួយរុស្ស៊ីនៅលើមូលដ្ឋានដ៏រឹងមាំមួយផងដែរ៕