មនុស្សម្នារាប់សែននាក់ទាំងនៅសហរដ្ឋអាមេរិក និងជុំវិញពិភពលោក បានប្រមូលផ្តុំគ្នាតវ៉ាកាលពីថ្ងៃព្រហស្បតិ៍ ក្នុងទិវាពលកម្មអន្តរជាតិ ០១ ឧសភា ឬហៅថា May Day ដែលមើលឃើញមនុស្សជាច្រើនសម្ដែងការខឹងសម្បារចំពោះរបៀបវារៈនៃគោលនយោបាយរបស់លោកប្រធានាធិបតីអាមេរិក Donald Trump រាប់ចាប់ពីពន្ធដ៏កម្រោលដែលបង្កការភ័យខ្លាចពីចលាចលសេដ្ឋកិច្ចសកល រហូតដល់ការបង្ក្រាបអន្តោប្រវេសន៍ដ៏ចាស់ដៃរបស់រដ្ឋបាលលោក។

នៅអាមេរិក អ្នករៀបចំបាតុកម្មបានហៅការតវ៉ាទិវាពលកម្មអន្តរជាតិនៅឆ្នាំនេះ ថាជាការរុញច្រានប្រឆាំងនឹងអ្វីដែលពួកគេមើលឃើញថាជាការវាយលុកដ៏ខ្លាំងក្លារបស់រដ្ឋបាលលោក Trump លើការការពារពលកម្ម គំនិតផ្តួចផ្តើមចម្រុះជំនាញ និងនិយោជិតសហព័ន្ធ។ ក្រុមបាតុករបានតវ៉ាតាមដងផ្លូវក្នុងកន្លែងជាច្រើន ដូចជា New York, Philadelphia, និង Los Angeles ជាដើម ហើយក៏ប្រមូលផ្តុំគ្នាយ៉ាងកុះករនៅក្រៅសេតវិមាន នៅទីក្រុងវ៉ាស៊ីនតោនផងដែរ។

បាតុកម្មនៅអឺរ៉ុប ផ្តោតលើគោលនយោបាយពាណិជ្ជកម្មលោក Trump និងកំណើនស្តាំនិយមជ្រុល។ មេដឹកនាំសហជីពបារាំង បានថ្កោលទោស "ការផ្លាស់ប្ដូររបស់លោក Trump" នៃនយោបាយពិភពលោក ដោយនិយាយថា បាតុកម្មនៅទូទាំងប្រទេសត្រូវជំរុញដោយកំហឹងលើឥទ្ធិពលយោធា និងពាណិជ្ជកម្មរបស់អាមេរិក នៅអឺរ៉ុប។ ជាមួយគ្នានេះ បាតុកររាប់ម៉ឺននាក់នៅអាល្លឺម៉ង់ ស្វីស អេស៉្បាញ និងប្រទេសអឺរ៉ុបផ្សេងទៀត បានក្រោកឡើងតតាំងនឹងមនោសញ្ចេតនាប្រឆាំងអន្តោប្រវេសន៍ បន្ទុកការងារ រួមទាំងកំណើននយោបាយរបស់ក្រុមស្ដាំនិយមជ្រុល។

ការភ័យខ្លាចខាងសេដ្ឋកិច្ចដែលជំរុញដោយលោក Trump ក៏បានគ្របដណ្ដប់ក្នុងការតវ៉ានៅអាស៊ីផងដែរ។ នៅហ្វីលីពីន ឥណ្ឌូនេស៊ី កោះតៃវ៉ាន់ និងកន្លែងផ្សេងទៀត បាតុករបានព្រមានថា “សង្គ្រាមពន្ធ និងគោលនយោបាយលោក Trump” បានគំរាមកំហែងដល់ឧស្សាហកម្មក្នុងស្រុក និងជីវភាពរស់នៅរបស់ប្រជាជន។ នៅទួរគីវិញ បានមើលឃើញមនុស្សរាប់ម៉ឺននាក់ប្រមូលផ្ដុំគ្នាតវ៉ានៅទីក្រុងអ៊ីស្តង់ប៊ុល ដោយអាជ្ញាធរនិយាយថា មនុស្សរាប់រយនាក់ត្រូវចាប់ខ្លួន៕