អ្នកព្យាករអាកាសធាតុរបស់រដ្ឋាភិបាលនូវែលសេឡង់ នៅថ្ងៃសុក្រ (០២ ឧសភា) នេះបានឱ្យដឹងថា ការព្រមានពីអាកាសធាតុធ្ងន់ធ្ងរភាគច្រើននៅទូទាំងប្រទេសនូវែលសេឡង់ ឥឡូវនេះត្រូវបានដកចេញហើយ ខណៈដែលការបោសសម្អាតកម្ទេចកម្ទីបន្ទាប់ពីព្យុះភ្លៀងដ៏ធំបានចាប់ផ្ដើម។

រដ្ឋធានីវែលីងតោន របស់នូវែលសេឡង់ រងការវាយប្រហារដោយខ្យល់បក់បោកខ្លាំងបំផុតក្នុងពេលជាងមួយទសវត្សរ៍ កាលពីថ្ងៃព្រហស្បតិ៍ ដោយសាលារៀន និងការិយាល័យត្រូវបិទ ហើយលុបចោលជើងហោះហើរជាច្រើន។ ចុងភាគខាងត្បូងក្នុងតំបន់ Canterbury នៅកណ្តាលកោះ South Island ភ្លៀងធ្លាក់ខ្លាំងបានបង្កជាទឹកជំនន់យ៉ាងគំហុក និងបំណាក់ដី ដែលបង្ខំឱ្យមនុស្សច្រើននាក់ត្រូវជម្លៀស។

ទាំងទីក្រុង Christchurch និងតំបន់ Selwyn នៅតែស្ថិតក្នុងគ្រាអាសន្ន ដោយសារនៅតែមានទឹកជំនន់ និងការបិទផ្លូវ ប៉ុន្តែក្រុមប្រឹក្សាតំបន់ Selwyn និយាយថា អាកាសធាតុដ៏អាក្រក់បំផុតបានចប់ហើយ។

អាកាសយានដ្ឋានអន្តរជាតិ វែលីងតោន បើកដំណើរការឡើងវិញ ខណៈព័ត៌មានក្នុងស្រុក Stuff រាយការណ៍ថា មានតែយន្តហោះមួយចំនួនប៉ុណ្ណោះអាចចុះចតបាន។ រូបភាពនៅលើគេហទំព័រព័ត៌មានក្នុងស្រុក បានបង្ហាញពីដុំថ្ម និងកម្ទេចកម្ទី ដែលរាយប៉ាយពេញផ្លូវតាមបណ្តោយឆ្នេរភាគខាងត្បូងនៃទីក្រុង ហើយរលកនៅតែបន្តបោកបក់ហួសពីជញ្ជាំងសមុទ្រ។ ជាអាជ្ញាធរបន្តណែនាំអ្នកស្រុកកុំឱ្យធ្វើដំណើរចេញក្រៅ ប្រសិនបើមិនចាំបាច់៕