ប្រភពជាច្រើនដែលដឹងពីបញ្ហានេះបាននិយយាថា ចារកម្មសម្ងាត់ថ្មីដែលត្រួតពិនិត្យដោយមន្ត្រីអាមេរិក និងលោកខាងលិច បានបង្ហាញថា ប្រធានាធិបតីរុស្ស៊ី លោក Vladimir Putin ប្រហែលជាបានផ្លាស់ប្តូរគោលដៅភ្លាមៗរបស់លោកក្នុងសង្រ្គាមអ៊ុយក្រែន ឆ្ពោះទៅរកគោលដៅរយៈពេលខ្លីនៃការពង្រឹងទឹកដីកាន់កាប់ ដែលកងកម្លាំងរុស្ស៊ីបានវាយដណ្តើមយក និងជំរុញសេដ្ឋកិច្ចរបស់ប្រទេស។

រឿងនេះតំណាងឱ្យការប្រែប្រួលខ្លាំងពីការវាយតម្លៃចារកម្មសម្ងាត់របស់អាមេរិក និងលោកខាងលិចកាលពីពេលថ្មីៗ ដែលធ្លាប់បង្ហាញថា លោក Putin មានអារម្មណ៍ថា រុស្ស៊ីកំពុងមានប្រៀបក្នុងសង្រ្គាម ហើយថាលោកកំពុងមានសន្ទុះជាពិសេសលើកម្លាំងទ័ព ដើម្បីទ្រទ្រង់ការប្រយុទ្ធយូរអង្វែងប្រឆាំងនឹងអ៊ុយក្រែនដែលកំពុងដួលរលំ និងក្រសោបយកទឹកដីទាំងមូល។

ប្រភពពីអាមេរិក បានប្រាប់សារព័ត៌មាន CNN ថា ការយល់ឃើញ ដែលថាលោក Putin ប្រហែលជាប្តូរគំនិតនេះ បានដើរតួសំខាន់ក្នុងចិត្តលោកប្រធានាធិបតី Donald Trump និងក្រុមអ្នកចរចាអាមេរិក ដែលជំរុញឱ្យទីក្រុងវ៉ាស៊ីនតោនគិតថា ប្រធានាធិបតីរុស្ស៊ីរូបនេះប្រហែលជាមានឆន្ទៈពិចារណាលើលទ្ធភាពនៃកិច្ចព្រមព្រៀងសន្តិភាពជាងកាលពីមុន។

ទោះយ៉ាងនេះក្ដី ក្រុមមន្រ្តីអាមេរិកនៅតែសង្ស័យលើការអះអាងម្ដងហើយម្ដងទៀតរបស់លោក Putin ដែលថាលោកចង់បានកិច្ចព្រមព្រៀងសន្តិភាព ដោយសារអ្វីដែលត្រូវបានស្នើឡើងដោយអាមេរិក គឺលម្អៀងទៅរុស្ស៊ី ដោយប្រគល់ឱ្យទីក្រុងមូស្គូនូវទឹកដីអ៊ុយក្រែនភាគច្រើន ដែលស្ថិតក្រោមការកាន់កាប់។ លើសពីនេះ ក៏មានជំនឿយ៉ាងទូលំទូលាយថា បើទោះបីជារុស្ស៊ី យល់ព្រមចំពោះសំណើកិច្ចព្រមព្រៀងនៅលើតុចរចាក៏ដោយ ក៏អាចនៅតែចង់បន្តសង្រ្គាម និងព្យាយាមដណ្តើមកាន់កាប់អ៊ុយក្រែន បន្ថែមទៀតក្នុងរយៈពេលវែងផងដែរ៕