អង្គការមិនមែនរដ្ឋាភិបាលអន្តរជាតិមួយឈ្មោះ The Freedom Flotilla Coalition ហៅកាត់ FFC បាននិយាយថា នាវាដឹកជំនួយមនុស្សធម៌ និងសកម្មជន មួយគ្រឿង ដែលធ្វើដំណើរទៅកាន់តំបន់សង្គ្រាមហ្កាហ្សា រងការទម្លាក់គ្រាប់បែកដោយយានដ្រូន ខណៈកំពុងស្ថិតនៅក្នុងដែនទឹកអន្តរជាតិ ពីប្រទេសម៉ាល់តា នៅព្រឹកថ្ងៃសុក្រ ០២ ឧសភា នេះ។

អង្គការនោះបានបង្ហោះវីដេអូដែលបង្ហាញពីការឆាបឆេះនៅលើនាវាមួយគ្រឿងរបស់ខ្លួន ប៉ុន្តែមិនបានបញ្ជាក់ថានរណាអាចជាអ្នកវាយប្រហារនោះទេ ហើយក៏មិនទាន់មានការបញ្ជាក់ភ្លាមៗថាមានមនុស្សរងរបួសឬអត់នោះដែរ។

អង្គការក្រៅរដ្ឋាភិបាល FFC មួយនេះបាននិយាយនៅក្នុងការបង្ហោះប្រព័ន្ធផ្សព្វផ្សាយសង្គមថា "ការវាយប្រហារដោយយានដ្រូន ហាក់ដូចជាបានកំណត់គោលដៅជាពិសេសទៅលើម៉ាស៊ីនរបស់នាវា ហើយឥឡូវនេះ នាវាមានហានិភ័យក្នុងការលិច ជាមួយសកម្មជនសិទ្ធិមនុស្សអន្តរជាតិចំនួន ៣០នាក់ នៅលើនោះ"។

អង្គការសប្បុរសធម៌នេះនិយាយថា នាវានោះបានស្នើសុំជំនួយគ្រាអាសន្ន SOS បន្ទាប់ពីបានរងការវាយប្រហារចម្ងាយ ១៧ម៉ាយល៍ណត់នៅសមុទ្រ ភាគខាងកើតនៃប្រទេសម៉ាល់តា ហើយប្រទេសកោះស៊ីប បានឆ្លើយតបដោយការបញ្ជូននាវាមួយគ្រឿងទៅជួយសង្រ្គោះ៕