គណៈកម្មការការពារទិន្នន័យរបស់ប្រទេសអៀរឡង់ បានប្រកាសកាលពីថ្ងៃសុក្រថា កម្មវិធីចែករំលែកវីដេអូ TikTok បានបញ្ជូនដោយមិនសមស្របនូវទិន្នន័យរបស់អ្នកប្រើប្រាស់អឺរ៉ុបទៅប្រទេសចិន។ គណៈកម្មការ បានចេញការផាកពិន័យចំនួន៥៣០លានអឺរ៉ូ ឬប្រហែល៦០០លានដុល្លារ។

អង្គការឃ្លាំមើលទិន្នន័យនៅក្នុងសហភាពអឺរ៉ុបបាននិយាយថា កម្មវិធីនេះបានបំពានច្បាប់ឯកជនភាពរបស់ប្លុកអឺរ៉ុប។ អង្គការបាននិយាយថា ច្បាប់ចារកម្មជាតិរបស់ប្រទេសចិន តម្រូវឱ្យក្រុមហ៊ុន និងប្រជាពលរដ្ឋទាំងអស់ប្រគល់ទិន្នន័យ និងបាននិយាយថា ក្រុមហ៊ុន TikTok ពុំមានតម្លាភាពដល់អ្នកប្រើប្រាស់អំពីកន្លែងដែលព័ត៌មានផ្ទាល់ខ្លួនរបស់ពួកគេត្រូវបានផ្ញើ។ 

គណៈកម្មាការកំពុងផ្តល់ឱ្យ ក្រុមហ៊ុន TikTok រយៈពេល៦ខែ ដើម្បីបំពេញតាមគោលការណ៍ឯកជនភាពរបស់សហភាពអឺរ៉ុប ហើយការខកខានមិនបានធ្វើដូច្នេះនឹងនាំឱ្យមានការផ្អាកការផ្ទេរទិន្នន័យទាំងអស់ទៅកាន់ប្រទេសចិន។ 

ទោះជាយ៉ាងណា ក្រុមហ៊ុន TikTok មិនយល់ស្របនឹងសេចក្តីសម្រេចនេះទេ ហើយមានផែនការប្តឹងឧទ្ធរណ៍។ ក្រុមហ៊ុននិយាយថា ប្រទេសចិនពុំដែលស្នើសុំទិន្នន័យសម្រាប់អ្នកប្រើប្រាស់អឺរ៉ុបទេ ហើយក្រុមហ៊ុន ក៏មិនដែលផ្តល់ព័ត៌មាននោះដែរ។