ប្រព័ន្ធផ្សព្វផ្សាយរដ្ឋ បានរាយការណ៍នៅថ្ងៃចន្ទ (០៥ ឧសភា) នេះថា មនុស្សយ៉ាងហោចណាស់ ៩នាក់ បានស្លាប់ និង ៧០នាក់ ត្រូវបញ្ជូនទៅមន្ទីរពេទ្យ បន្ទាប់ពីខ្យល់បក់ខ្លាំងបានបណ្តាលឱ្យទូកដឹកអ្នកទេសចរជាច្រើនគ្រឿងក្រឡាប់លិចនៅឯទីតាំងទេសចរណ៍ដ៏ស្រស់ស្អាតមួយកន្លែងនៅភាគនិរតីនៃប្រទេសចិន។

ទូរទស្សន៍រដ្ឋ CCTV បាននិយាយថា ទូកដឹកអ្នកដំណើរ ៤គ្រឿងបានក្រឡាប់លិចកាលពីរសៀលថ្ងៃអាទិត្យ លើទន្លេមួយក្នុងក្រុង ឈានស៊ី (Qianxi) ខេត្ត គួយចូវ (Guizhou) បណ្ដាលឱ្យមនុស្សចំនួន ៨៤នាក់ ធ្លាក់ចូលក្នុងទឹក។ ប្រព័ន្ធផ្សព្វផ្សាយរដ្ឋបន្តថា គិតត្រឹមព្រឹកថ្ងៃចន្ទនេះ មនុស្ស ៩នាក់បានស្លាប់ ៧០នាក់ត្រូវគេបញ្ជូនទៅមន្ទីរពេទ្យ និង ៤នាក់ទៀតមិនមានគ្រោះថ្នាក់ទេ ខណៈម្នាក់នៅបាត់ខ្លួន។

ទីភ្នាក់ងារសារព័ត៌មានរដ្ឋ Xinhua បាននិយាយថា ប្រធានាធិបតីចិន លោក Xi Jinping បានជំរុញឱ្យមាន "កិច្ចខិតខំប្រឹងប្រែងអស់លទ្ធភាព" ក្នុងប្រតិបត្តិការស្វែងរក និងសង្គ្រោះ និងព្យាបាលអ្នករបួស។ ទូរទស្សន៍ CCTV និយាយថា ការស៊ើបអង្កេតបានរកឃើញថា ទូកទាំងនោះមិនមានផ្ទុកអ្នកដំណើរលើសទម្ងន់ទេ។

អាជ្ញាធរខេត្តបានដាក់ពង្រាយក្រុមសង្គ្រោះបន្ទាន់ជិត ៥០០នាក់ រួមទាំងនគរបាល អ្នកពន្លត់អគ្គិភ័យ និងបុគ្គលិកពេទ្យ ដើម្បីសម្របសម្រួលកិច្ចខិតខំប្រឹងប្រែងជួយសង្គ្រោះនេះ៕