ប្រធានាធិបតីអ៊ុយក្រែន លោក Volodymyr Zelenskyy បានថ្កោលទោសរុស្ស៊ីចំពោះការបន្តវាយប្រហារប្រទេសរបស់លោក ទោះបីជាមានការអះអាងជាឯកតោភាគីដើម្បីអនុវត្តបទឈប់បាញ់នៅចុងសប្តាហ៍នេះក៏ដោយ។ ប្រព័ន្ធផ្សព្វផ្សាយ រាយការណ៍ថា រុស្ស៊ីបានបើកការវាយប្រហារដោយយានដ្រូន កាលពីថ្ងៃសៅរ៍ និងថ្ងៃអាទិត្យ ដោយបានបង្កឱ្យមានអគ្គិភ័យនៅផ្សារទំនើប និងអគារខ្ពស់ក្នុងរដ្ឋធានីគីវ។ ក្នុងការវាយប្រហារនេះ មនុស្ស១១នាក់ក្នុងនោះកុមារពីរនាក់ បានរងរបួស។

ការវាយប្រហាររបស់រុស្សីលើតំបន់ភាគខាងកើតទីក្រុង Kharkiv និង Donetsk បានបណ្តាលឲ្យជនស៊ីវិលបួននាក់ស្លាប់។ លោក Zelenskyy បាននិយាយកាលពីថ្ងៃអាទិត្យថា ប្រទេសរុស្ស៊ីបានប្រើប្រាស់យានដ្រូនវាយប្រហារជាង១.១៨០លើក និងទម្លាក់គ្រាប់បែកពីលើអាកាសស៊ីបគោលដៅ១.៣៦០គ្រាប់ ដើម្បីវាយប្រហារអ៊ុយក្រែន កាលពីសប្តាហ៍មុន។

លោក Zelenskyy បាននិយាយសំដៅទៅលើការប្រកាសជាឯកតោភាគីរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន អំពីបទឈប់បាញ់រយៈពេលបីថ្ងៃ ដែលចាប់ផ្តើមពីថ្ងៃព្រហស្បតិ៍។ វិមានក្រឹមឡាំង និយាយថា បទឈប់បាញ់នឹងប្រារព្ធខួប ៨០ឆ្នាំ ចាប់តាំងពីសហភាពសូវៀតទទួលបានជ័យជម្នះលើពួកណាស៊ីអាល្លឺម៉ង់ក្នុងសង្គ្រាមលោកលើកទី២។

លោក Zelenskyy និយាយថា ប្រជាជនរុស្ស៊ីកំពុងអំពាវនាវឱ្យមានបទឈប់បាញ់ ខណៈកំពុងវាយប្រហារអ៊ុយក្រែនជារៀងរាល់ថ្ងៃ។ លោក បានបញ្ជាក់ពីតម្រូវការសម្រាប់អ្វីដែលលោកហៅថា «បទឈប់បាញ់ពិតប្រាកដ»។ «ប្រសិនបើមានបទឈប់បាញ់ នោះពុំមែនសម្រាប់តែថ្ងៃឈប់សម្រាករបស់រុស្ស៊ីនោះទេ ប៉ុន្តែសម្រាប់រៀងរាល់ថ្ងៃ»។